Inspektorati i Mjedisit ka ndaluar punimet e një kompanie për separimin e inerteve, për shkak të mungesës së lejes ujore, ndërsa ka shqiptuar edhe tri gjoba administrative për shkelje të konstatuara lidhur me menaxhimin e ujërave dhe aktivitetet e operatorëve, përcjell KosovaPost.
Këto të dhëna i ka bërë të ditura ministrja Fitore Pacolli, përmes një postimi, ku ka njoftuar për kontrollet në terren të Inspektoratit të Mjedisit gjatë kësaj jave.
Sipas saj, gjatë kësaj periudhe janë inspektuar gurthyesit dhe janë kërkuar raportet e analizave të pluhurit për vitin 2026.
Po ashtu, janë evidentuar mangësi në menaxhimin e ujit në hapësirën e magazinimit të mbetjeve radioaktive në Termocentralin Kosova A, duke caktuar afat për sanimin e tyre.
Ndërkohë, janë zhvilluar inspektime për ndërhyrjet në rrjedhat ujore në disa komuna.
“Inspektorati do të vazhdojë kontrollet dhe do të ndërmarrë masa ligjore ndaj çdo shkeljeje të konstatuar”, ka shkruar Pacolli.
