Gjermania thotë se aktiviteti i spiunazhit rus do të rritet, për aq kohë sa do të zgjasë lufta në Ukrainë.
Kreu i inteligjencës gjermane paralajmëroi të hënën për rritjen e aktivitetit nga shërbimet sekrete ruse.
“Interesi i inteligjencës ruse këtu në Gjermani nuk është vetëm i vazhdueshëm, por gjithashtu po rritet ndërsa efektet e luftës vazhdojnë”, tha Thomas Haldenwang, shefi i Zyrës Federale për Mbrojtjen e Kushtetutës, në një intervistë me agjencinë gjermane të lajmeve, DPA.
“Rasti aktual tregon gjithashtu se sa real është rreziku i spiunazhit rus”, shtoi Haldenwang, duke aluduar për një agjent të dyshuar të dyfishtë në shërbimin sekret të huaj BND, i cili u arrestua pak para Krishtlindjeve.
I arrestuari akuzohet se i ka dhënë informacion sekret një shërbimi inteligjent rus.
Haldenwang tha se ai pret që Moska të përpiqet të hakmerret për dëbimin e 40 zyrtarëve rusë të konsideruar persona non grata nga Gjermania. Si reagim ndaj fillimit të luftës ruse kundër Ukrainës më 24 shkurt, shumë shtete evropiane dëbuan agjentët rusë, me Gjermaninë që dëboi 40 anëtarë të ambasadës ruse në Berlin.
“Ne po bëjmë përpjekje të mëdha për të parandaluar që njerëz të tjerë që mund të jenë të lidhur me shërbimet ruse të vijnë këtu në Gjermani”, tha Haldenwang, duke shtuar se qeveria gjermane ka shtrënguar rregullat e vizave.
Ai gjithashtu pret një rritje masive të sulmeve kibernetike ruse dhe të ashtuquajturat operacione të ndikimit, duke përfshirë fushata dezinformuese dhe metoda të tjera që synojnë të ndikojnë në opinionin publik, rezultatin e zgjedhjeve ose vendimet politike në vendin e synuar.
