Ish-komandanti i ushtrisë serbe dhe njëherit kryetari i Partisë Qendra e Serbisë (SRCE), Zdravko Ponosh, ka folur pas sulmit terrorist ndaj Policisë së Kosovës, ku ka thënë se përleshjet e armatosura me pasoja tragjike në Banjskë të Zveçanit kanë treguar se shërbimet e sigurisë së Serbisë janë “thyer”.
Më tej, ai ka thënë se Serbia është e befasuar nga reagimi i Njësisë Speciale të Kosovës dhe, sipas tij, organet e sigurisë së Serbisë nuk e kishin pritur një kundërpërgjigje të tillë.
“Një gjë është se a kanë ditur për ekzistencën e formacionit të armatosur serb dhe a e kanë ditur se kush e ka udhëhequr atë formacion dhe çfarë qëllimesh kanë. Autoritetet në Beograd u befasuan nga veprimi i Policisë së Kosovës dhe kjo tregon se sa keq është shkatërruar Serbia në aspektin e sigurisë”, ka thënë Ponosh.
Sipas tij, lidershipi shtetëror ka mbetur i befasuar nga ngjarjet e djeshme në Banjskë, gjë që vërteton, siç tha ai, se Beogradi nuk është në gjendje të kontrollojë situatën në Kosovë.
“Nëse regjimi në Beograd nuk është i përditësuar me organizimin e armatosur të serbëve në veri, të cilët kanë shumë arsye të ndihen të kërcënuar dhe të lënë pas, atëherë ky është një problem. Problem tjetër është nëse regjimi ka informacione për organizatat e armatosura të serbëve dhe nuk i kontrollon ata. Viktimat më të mëdha të këtyre problemeve në kontrollimin e situatës janë serbët në Kosovë dhe ata të rinj që dikush i ka joshur për t’u bërë renegatë, dhe ata dukshëm janë të patrajnuar dhe dje u flijuan dhe u vranë si pëllumba”, ka deklaruar Ponosh.
“Presidenti serb Aleksandar Vuçiq përmendi përgjimin e ndihmësve të Kurtit si informacionin më të rëndësishëm të marrë nga agjencitë e inteligjencës serbe”, por kjo për ish-komandantin e përgjithshëm të ushtrisë së Serbisë, “është skandaloze”.
Ndërkohë ai ka pyetur se për çfarë shërbejnë shërbimet serbe të sigurisë.
“Duhet të pyesim veten se për çfarë shërbejnë shërbimet e sigurisë së Serbisë. Nëse kanë ditur për vetorganizimin e armatosur të serbëve në Kosovë dhe kanë lejuar që të rinjtë të vriten në këtë mënyrë, atëherë jemi në një problem vërtet të madh”, tha ai.
“Beogradi bën bujë herë pas here me ushtrinë afër vijës së kufirit me Kosovën dhe rrit pritshmëritë e serbëve në Kosovë. Vuçiq mban fjalime të forta patriotike plot me ngarkesë nacionaliste, por në fakt serbët në Kosovë i la të vetëm. Nuk mund të presim asgjë të mirë, sepse dje aktorët ndërkombëtarë u sollën shumë çuditshëm. KFOR-i heshti dhe imazhi i çështjes serbe në Kosovë u dëmtua në kurriz të interesave serbe. Në muajt e fundit, për shkak të sjelljes së paarsyeshme të Kurtit, serbët kishin avantazh diplomatik, por dje është bërë një dëm i madh. Është e mundur që dikush tani do të përdorë ngjarjet në Banjskë për të mbyllur librin për Kosovën, të cilin e pranuan edhe Vuçiq edhe Kurti në Bruksel dhe Ohër”, tha Ponosh.
Ndërsa, kryetari i Partisë Qendra e Serbisë (SRCE), Zdravko Ponosh, ka qenë deri në vitin 2008 komandant i përgjithshëm i ushtrisë së Serbisë, raporton nspm.rs, përcjell Dukagjini.
