Të paktën 140 palestinezë janë vrarë në Gaza në 24 orët e fundit, një përshkallëzim vdekjeprurës pasi Izraeli dukej gati për të nisur një ofensivë të madhe në territorin e rrethuar.
Sulmet izraelite në Gaza kanë vrarë më shumë se 300 njerëz që nga e enjtja, njoftuan zyrtarët palestinezë shëndetësorë, një nga periudhat më vdekjeprurëse në luftë që nga prishja e bisedimeve për armëpushimin në mars.
Fushatat e intensifikuara të bombardimeve erdhën pasi bllokada totale e Izraelit ndaj ndihmës humanitare ka shkaktuar frikën e një zie buke në territorin palestinez.
Bëhet e ditur se përshkallëzimi i sulmeve u dënua nga shefi i OKB-së për të drejtat e njeriut, Volker Turk, i cili tha se fushata e bombardimeve kishte për qëllim të zhvendoste palestinezët dhe se ishte e barabartë me spastrimin etnik, shkruan the Guardian, përcjell Telegrafi.
“Kjo breshëri e fundit bombash … dhe mohimi i ndihmës humanitare nënvizojnë se duket se ka një shtytje për një ndryshim të përhershëm demografik në Gaza që është në kundërshtim me ligjin ndërkombëtar dhe është e barabartë me spastrimin etnik”, tha ai.
Komentet e Turk u bënë jehonë edhe nga sekretari i përgjithshëm i OKB-së, Antonio Guterres, i cili bëri thirrje për një armëpushim të përhershëm ndërsa fliste në një samit të Ligës Arabe në Bagdad.
Ndërkohë, Izraeli tha se bombardimet ishin fazat fillestare të Operacionit “Gideon’s Chariots”, një zgjerim i fushatës në Gaza që synonte “të arrijë të gjitha qëllimet e luftës”.
Raportohet se sulmet u shoqëruan nga një grumbullim i madh trupash përgjatë kufijve të Gazës, që synonte vendosjen e “kontrollit operacional” të zonave.
Dhe vijnë pasi Donald Trump u largua nga Lindja e Mesme pas një vizite katër-ditore në vendet e Gjirit Arab.
Ndryshe, shpresat se vizita e Trump mund të sjellë përparim të ri në bisedimet e armëpushimit në Gaza u shuan pasi Trump përsëriti dëshirën e tij për ta kthyer Gazën në një “zonë të lirë”.
