Zyrtarët izraelitë dhe palestinezë janë zotuar të zbatojnë masa për të de-përshkallëzuar dhunën në rritje pas bisedimeve në Jordani.
Në një deklaratë të përbashkët në fund të takimit në vendpushimin Akaba të Detit të Kuq të dielën, zyrtarët izraelitë dhe palestinezë thanë se do të punonin ngushtë për të parandaluar “dhunën e mëtejshme” dhe se ata “riafirmuan domosdoshmërinë e angazhimit për de-përshkallëzim”, shkruan Al Jazeera, përcjell Telegrafi.
Sipas mediumit në fjalë, pas “diskutimeve të plota dhe të sinqerta”, palët palestineze dhe izraelite “riafirmuan nevojën për t’u angazhuar për de-përshkallëzimin në terren dhe për të parandaluar dhunën e mëtejshme”, thuhet në deklaratë.
Deklarata e përbashkët erdhi në fund të një takimi ku morën pjesë gjithashtu zyrtarë të Shteteve të Bashkuara, Egjiptit dhe Jordanisë, mes shqetësimeve në rritje për një përshkallëzim të dhunës në prag të muajit të shenjtë mysliman të Ramazanit që fillon në fund të marsit.
Izraeli dhe Autoriteti Palestinez theksuan “gatishmërinë dhe angazhimin e përbashkët për të punuar menjëherë për të ndaluar masat e njëanshme” për tre deri në gjashtë muaj, sipas deklaratës.
Vendi pritës Jordania, së bashku me Egjiptin dhe SHBA-në, i konsideruan “këto mirëkuptime si përparim të madh drejt rivendosjes dhe thellimit të marrëdhënieve midis dy palëve”, thuhet në deklaratë.
Të dyja palët ranë dakord gjithashtu të takohen përsëri muajin e ardhshëm në Sharm el-Sheikh në Eqypt.
Por Grupi Hamas, i cili qeveris Rripin e rrethuar të Gazës, dënoi Autoritetin Palestinez me bazë në Bregun Perëndimor për pjesëmarrje. Një zyrtar nga grupi tha se takimi ishte “i pavlerë” dhe nuk do të ndryshonte asgjë.
