Ministrja e Mjedisit dhe Planifikimit Hapësinor, Fitore Pacolli, ka bërë të ditur se institucionet përgjegjëse për menaxhimin e mbeturinave në Prishtinë janë gjobitur, pas inspektimit të situatës nga Inspektorati i kësaj ministrie, përcjell KosovaPost.
Përmes një postimi, Pacolli ka thënë se gjatë inspektimit është konstatuar një gjendje e rëndë, e cila, sipas saj, po rrezikon drejtpërdrejt shëndetin e qytetarëve.
Ajo ka theksuar se menaxhimi i mbeturinave është një nga detyrat themelore të qeverisjes lokale, duke kritikuar Komunën e Prishtinës dhe ndërmarrjen publike për bartjen e përgjegjësisë te njëra-tjetra.
Pacolli ka përmendur edhe kryetarin e Prishtinës, Përparim Rama, duke thënë se dështimi në menaxhimin e mbeturinave ngre pikëpyetje për funksionimin e pushtetit lokal.
Ministrja ka theksuar se neglizhenca nuk duhet të normalizohet dhe se të gjithë ata që nuk i kryejnë detyrat e tyre duhet të mbajnë përgjegjësi.
“Ligji do të zbatohet, ndërsa dështimi do t’u faturohet të gjithë atyre, pa dallim, që po rrezikojnë shëndetin e qytetarëve”, ka shkruar Pacolli.
