Një ndërprerje e energjisë elektrike në aeroportin kryesor të Filipineve shkaktoi anulimin dhe shtyrjen e disa fluturimeve të brendshme dhe ndërkombëtare, duke krijuar panik dhe shqetësim te udhëtarët.
Për shkak të ndërprerjes n së energjisë që ndodhi të dielën në mëngjes (1/1/23), rreth 300 fluturime vendase dhe ndërkombëtare u vonuan, anuluan ose u devijuan drejt aeroporteve të tjera nga aeroporti i Manilës.
Më shumë se 65,000 pasagjerë u prekën nga ndryshimet e fluturimeve. Sekretari i Transportit Jaime Bautista tha në një konferencë shtypi se kanalet e komunikimit, interneti, radio dhe radari u prekën nga ndërprerja e energjisë në Qendrën e Kontrollit të Trafikut Ajror.
Fluturimet rifilluan nga aeroporti Ninoy Aquino në kryeqytetin Manila pasi sistemi i trafikut ajror u rivendos gjatë ditës. Ndërkohë, autoritetet u kanë kërkuar kompanive ajrore të rrisin numrin e fluturimeve për të adresuar ankesat e pasagjerëve. Autoritetet kanë këshilluar se mund të duhen deri në 3 ditë që fluturimet të kthehen në nivelin e tyre normal.
