Përfaqësuesit e kompanisë Ananas Impex kanë reaguar pas njoftimit të Agjencisë së Ushqimit dhe Veterinarisë (AUV) lidhur me një ngarkesë të ndaluar në kufirin me Finlandën, duke mohuar se produktet e tyre paraqesin rrezik për konsumatorët. Kompania ka deklaruar se loti i raportuar nuk është shpërndarë në tregun e Kosovës, ndërsa analizat dhe kontrollet e kryera, sipas saj, kanë rezultuar në përputhje me standardet e sigurisë ushqimore dhe pa prezencë të pesticideve mbi kufijtë e lejuar.
Në deklaratën e saj, kompania garanton konsumatorët se të gjitha produktet prodhohen, përpunohen dhe tregtohen në përputhje me standardet ligjore dhe kërkesat e sigurisë ushqimore në fuqi.
Ananas Impex hedh poshtë pretendimet se produktet e saj të vendosura në tregun e Republikës së Kosovës paraqesin rrezik për shëndetin e konsumatorëve.
Kompania thekson se ka bashkëpunuar gjithmonë ngushtë dhe në mënyrë transparente me AUV-në, duke respektuar të gjitha kërkesat ligjore dhe procedurat e kontrollit zyrtar për garantimin e sigurisë ushqimore.
Sipas deklaratës, pas njoftimit të AUV-së përmes sistemit RASFF, në bashkëpunim me autoritetet kompetente është realizuar gjurmueshmëria e plotë e lotit të raportuar, me ç’rast është konstatuar se sasia e përmendur nuk gjendet dhe nuk është shpërndarë në tregun e Republikës së Kosovës.
Tutje thuhet se analizat laboratorike dhe kontrollet shtesë të kryera në produktet dhe lotët përkatës kanë rezultuar në përputhje të plotë me standardet e sigurisë ushqimore, pa prezencë të pesticideve mbi kufijtë e lejuar.
Po ashtu, sipas kompanisë, kontrollet zyrtare të realizuara nga AUV në objektet e saj dhe në terren nuk kanë evidentuar asnjë parregullsi apo bazë për ndërmarrjen e masave ndaluese ndaj produkteve të saj.
“Kjo deklaratë bazohet në procesverbalin zyrtar të lëshuar nga AUV pas inspektimeve, verifikimeve dhe kontrolleve të kryera. Kompania pret që sqarimi përfundimtar zyrtar nga AUV të konfirmojë gjetjet e deritanishme dhe faktet e paraqitura në këtë deklaratë”, thuhet në reagim.
Përndryshe, Agjencia e Ushqimit dhe Veterinarisë kishte njoftuar se përmes sistemit RASFF është informuar për ndalimin, në kufirin me Finlandën, të një ngarkese me produkt “Spec i kuq i bluar”, me origjinë nga Kosova dhe i prodhuar nga kompania Ananas Impex.
Sipas AUV-së, pas kryerjes së analizave laboratorike, ngarkesa kishte rezultuar pozitive me prani të pesticidit “Carbofuran” mbi kufijtë e lejuar, ndërsa e gjithë sasia ishte asgjësuar nga autoriteti kompetent. Agjencia kishte bërë të ditur se rasti mban numrin 2026.4462.
