Policia e Kosovës ka konfirmuar se një person ka humbur jetën si pasojë e të shtënave me armë zjarri në fshatin Pogragjë të Gjilanit.
Për Arbresh.info, zëdhënësi i Policisë për rajonin e Gjilanit, Valon Osmani, ka bërë të ditur se rasti është raportuar më 11 tetor, rreth orës 19:30.
Sipas informatave fillestare, viktima është një person i gjinisë mashkullore, i lindur në vitin 1997. Vdekjen e tij në vendin e ngjarjes e ka konstatuar ekipi mjekësor.
Lidhur me rastin, një person i dyshuar, mashkull kosovar dhe i njohur për Policinë, është vënë në kërkim policor, pasi dyshohet se është larguar nga vendi i ngjarjes pas kryerjes së veprës.
“Me datën 11.10.2026 rreth orës 19:30 kemi pranuar një informacion për të shtëna me armë zjarri në fshatin Pogragjë të komunës së Gjilanit. Menjëherë pas pranimit të informatës, në vendin e ngjarjes kanë dalë njësitë përkatëse policore dhe Prokurori i Shtetit. Sipas informatave fillestare dyshohet se si pasojë e të shtënave me armë zjarri ka humbur jetën një person i gjinisë mashkullore i lindur në vitin 1997. Vdekjen e viktimës në vendin e ngjarjes e ka konstatuar ekipi mjekësor. Lidhur me rastin një person i dyshuar mashkull kosovar i njohur për Policinë është vënë në kërkim policor, pasi dyshohet se pas kryerjes së veprës është larguar nga vendi i ngjarjes. Policia e Kosovës në koordinim me Prokurorin e Shtetit dhe njësitë përkatëse hetimore është duke ndërmarrë të gjitha veprimet e nevojshme hetimore dhe operative për lokalizimin dhe arrestimin e të dyshuarit si dhe për sqarimin e plotë të rrethanave të rastit”, thuhet në konfirmimin e Osmanit.
