Kongresisti amerikan, Ritchie Torres, ka thënë se deklarata e ministres serbe, Snezana Paunovic, për “spastrimin etnik të Kosovës”, është një përqafim i hapur i gjenocidit ndaj shqiptarëve.
Torres thotë se deklarata e saj është moralisht e dënueshme, duke i dhënë të drejtë Kosovës për shpalljen e saj “non-grata” dhe duke thënë se Paunovic duhet të japë dorëheqje menjëherë.
“Deklarata e Snezhana Paunoviqit se ajo do ta kishte kryer spastrimin etnik të Kosovës nëse do të ishte në vendin e Millosheviqit është moralisht e dënueshme dhe një përqafim i hapur i gjenocidit ndaj popullit shqiptar. Kosova kishte të drejtë ta ndalonte hyrjen e saj në vend dhe ajo duhet të japë dorëheqje të menjëhershme nga posti.”, ka thënë Ritchie Torres për Gazetën Express.
Lidhur me këtë deklaratë të Paunovic të enjten për Express kanë folur edhe nga Departamenti Amerikan i Shtetit. Washingtoni zyrtar ka bërë të qartë se prioritet është paqja në Ballkan Perëndimor dhe se normalizimi Kosovë-Serbi është i domosdoshëm për një gjë të tillë. Nga DASH kanë kërkuar që politikanët të kontribuojnë në këtë qëllim të Amerikës përmes gjuhës që përdorin.
