Republika e Kosovës është bërë zyrtarisht shtet mbështetës i Kodit të Praktikave për Shtetet në kuadër të Procesit Pall Mall, një iniciativë ndërkombëtare e udhëhequr nga Mbretëria e Bashkuar dhe Franca, e cila synon të rrisë përgjegjshmërinë dhe transparencën në përdorimin e teknologjive kibernetike, pëcjell KosovaPost.
Kryeministri Albin Kurti, njoftoi për këtë hap të rëndësishëm përmes një deklarate në Facebook, duke e cilësuar anëtarësimin si pjesë e angazhimit të Kosovës për të mbrojtur të drejtat e njeriut, sigurinë kombëtare dhe rendin ndërkombëtar në epokën digjitale.
“Me mbështetjen e këtij Kodi, Kosova i bashkohet një koalicioni në rritje të vendeve demokratike që punojnë për të siguruar që mjetet kibernetike të përdoren në përputhje me të drejtën ndërkombëtare dhe standardet për të drejtat e njeriut”, tha Kurti.
Procesi Pall Mall është një iniciativë e përbashkët e Qeverisë së Mbretërisë së Bashkuar dhe Qeverisë së Francës, e lansuar në shkurt të vitit të kaluar, që bën bashkë vendet demokratike të përkushtuara për të adresuar përhapjen dhe përdorimin e papërgjegjshëm të kapaciteteve komerciale për ndërhyrje kibernetike.
Kodi i Praktikave për Shtetet, i prezantuar zyrtarisht më 3–4 prill gjatë Takimit të Dytë të Procesit Pall Mall në Paris, synon të frenojë përhapjen dhe përdorimin e papërgjegjshëm të kapaciteteve komerciale për ndërhyrje kibernetike, teknologji këto që gjithnjë e më shumë po paraqesin rrezik për privatësinë dhe sigurinë në mbarë botën.
Ky Kod përcakton parime udhëzuese për rritjen e transparencës, llogaridhënies dhe mbikëqyrjes, duke promovuar sjellje të përgjegjshme të shteteve në hapësirën kibernetike.
Pjesëmarrja e Kosovës në këtë proces e rreshton vendin përkrah shteteve që promovojnë përdorim etik dhe ligjor të teknologjisë, duke fuqizuar më tej pozicionin ndërkombëtar të saj si një partner i besueshëm dhe demokratik.
