Kosova U21 ka shënuar fitore të rëndësishme ndaj Qipros me rezultat 2-1, në kuadër të ndeshjes së nëntë të eliminatoreve për Kampionatin Evropian, që do të mbahet në Shqipëri dhe Serbi.
Pas një pjese të parë të mbyllur pa gola, drama e vërtetë nisi në pjesën e dytë, ku u shënuan tri gola.
Qipro kaloi e para në epërsi në minutën e 52-të. Savvas Kontopoulos realizoi për 1-0, duke i dhënë avantazhin skuadrës vendase.
Megjithatë, Dardanët e rinj reaguan dhe vetëm 17 minuta më vonë arritën ta barazonin rezultatin.
Erion Sadriu, i cili sapo ishte inkuadruar në lojë, pranoi një top në zonë dhe u ndal nga një mbrojtës qipriot. Arbitri akordoi penallti, ndërsa Hekuran Berisha ishte i saktë nga pika e bardhë për 1-1.
Kosova nuk u ndal me kaq.
Vetëm shtatë minuta pas barazimit, Berisha u shndërrua në asistues, duke dhënë një pasim të bukur për Lirim Jasharin. Ky i fundit goditi fuqishëm nga rreth 20 metra dhe e dërgoi topin në rrjetë për përmbysjen e madhe, 2-1.
Pas golit të dytë të Kosovës, qipriotët humbën qetësinë, ndërsa ndeshja u bë më e ashpër.
Dy futbollistë të Qipros u ndëshkuan me kartonë të kuq, duke e lënë skuadrën me nëntë lojtarë.
Me këtë fitore, Kosova U21 arrin në kuotën e 14 pikëve pas nëntë ndeshjeve dhe aktualisht renditet në vendin e katërt në grup.
