Komisioni i Pavarur i Medieve ka miratuar transmetimin eksperimental të “Radio Policisë së Kosovës”, me synim informimin e qytetarëve për sigurinë publike dhe atë në trafik. Sipas KPM-së, transmetimi do të shërbejë për testimin e sinjalit dhe përmbajtjeve, pa konkurruar me radiot e licencuara dhe pa aktivitete komerciale.
Transmetimi eksperimental “Radio Policia e Kosovës” është miratuar nga Komisioni i Pavarur i Mediave. Gjatë mbledhjes, ushtruesi i detyrës së kryeshefit ekzekutiv të këtij komisioni, Namon Racaj, ka shpjeguar se kërkesa e Policisë së Kosovës për mundësinë e hapjes së radios ka për qëllim informimin e qytetarëve për sigurinë në trafik dhe sigurinë publike.
“Këto subjekte që marrin leje për transmetim eksperimental nuk mund t’i konkurrojnë tregut medial ose transmetuesve të licencuar që veprojnë me licencë të KPM-së. Të gjitha aktivitetet komerciale të transmetuesve eksperimentalë ndalohen”, tha Namon Racaj, u.d kryeshefit ekzekutiv i KPM -së.
Ndërkaq kryesuesi i KPM-së, Besnik Berisha, e ka cilësuar kërkesën si një mundësi të rëndësishme për të testuar funksionimin e lajmërimeve të trafikut përmes transmetimeve radiofonike.
“Nga se prapëseprapë kjo është transmetim eksperimental, jo me obligime ndaj publikut. Mirëpo kjo për qellim të testojë efektet e ndikimit veçanërisht këtë pjesën e lajmërimeve të trafikut”, tha Berisha.
Leja për transmetim eksperimental fillimisht mund të jepet për një vit, me mundësi vazhdimi, me qëllim të testimit të mbulueshmërisë, përmirësimit të sinjalit dhe përmbajtjeve që mund të ofrohen përmes formave të reja të transmetimit.
