Kryeministri i Çekisë, Andrej Babish, ka kërkuar falje pasi këputi lule në një zonë të mbrojtur në malin Lysá hora, në lindje të vendit, duke thënë se do ta paguajë gjobën nëse është e nevojshme.
Babish tha në një video të publikuar në Facebook se i kishte këputur lulet teksa kujtonte një koleg të ndjerë nga lëvizja e tij ANO, me të cilin më herët kishte ngjitur malin.
“Ndoshta kam shkelur ndonjë ligj, për çka kërkoj falje dhe patjetër që do ta paguaj gjobën nëse është e nevojshme”, tha ai.
Pamjet nga ecja e së shtunës, të publikuara në Facebook, tregojnë Babishin duke u ngjitur me një tufë të vogël lulesh, të cilat më pas i vendosi pranë një monumenti në majë.
Kryeministri çek shoqërohej nga dy ministra, politikanë të ANO-s dhe mbështetës në majën 1.324 metra të lartë, pika më e lartë e Beskidëve Moravo-Silezianë.
Një ekspert mjedisor, që punon për një organizatë nën mbikëqyrjen e Ministrisë çeke të Mjedisit, i tha medias lokale iDNES se Babish kishte këputur dy lloje të zakonshme lulesh dhe se kishte pak gjasa të përballej me ndonjë ndëshkim.
“Ato janë lule krejtësisht të zakonshme. Absolutisht asnjë problem, madje as në një park kombëtar”, tha eksperti, emri i të cilit nuk u bë publik. /Politico.eu
