Kryeministri Albin Kurti është takuar me kryetaren e sapo zgjedhur të Komunës së Preshevës, Ardita Sinani.
Në komunikatën e dërguar për media nga zyra e Kryeministrisë, thuhet se Kurti e uroi për formimin e koalicionit me Partinë Demokratike Shqiptare të drejtuar nga Ragmi Mustafa dhe për detyrën e re si kryetare e komunës.
“Kryeministri Kurti i ofroi mbështetje në realizimin e programit qeverisës dhe shprehu gatishmërinë e tij dhe të qeverisë për bashkëpunim të afërt institucional në shërbim të Preshevës dhe qytetarëve atje pa dallim”, thuhet në komunikatë.
Sinani gjithashtu është pritur edhe nga zëvendëskryeministri Besnik Bislimi.
“Ata diskutuan mbi rëndësinë e mbrojtjes dhe ruajtjes së identitetit kulturor të shqiptarëve në Serbi, i cili në vazhdimësi përballet me politika destruktive nga Beogradi zyrtar”, thuhet për takimin Sinani – Bislimi.
Ardita Sinani u zgjodh kryetare e Komunës së Preshevës me 24 vota në asamblenë komunale, të mbajtur më 30 korrik.
