Kryeministri në detyrë, Albin Kurti njëherit kryetar i Lëvizjes Vetëvendosje, ka thënë se kjo parti ua ndali përfitimet e paligjshme opozitës.
Madje, ai ka thënë se kjo është njëra nga arsyet që ata nuk e kanë votuar, Albulena Haxhiun për kryetare të Kuvendit.
“Opozita nuk ka problem me Albulena Haxhiun, por me popullin që nuk ua dha besimin dhe me Vetëvendosjen- që ua ndali përfitimet e paligjshme. Katër vitet e fundit kanë qenë të vështira për ta, dhe i frikësohen se kjo do të zgjasë edhe më shumë. Ne jemi të zotuar të qeverisim për interesin publik, për një shtet të qytetarëve, jo për klane të interesit”, ka thënë Kurti në mbledhjen e Këshillit të Qendrës së Prishtinës.
Kurti duke folur për kandidatin e tyre për kryeqytetin, ka thënë Hajrulla Çeku është personi që i duhet Prishtinës.
“Hajrulla Çeku është kandidati që i duhet Prishtinës. Me përvojën e tij si ministër, ai ka dëshmuar se di të udhëheqë me vizion, përkushtim e rezultate konkrete. Ka sjellë zhvillim të dukshëm në kulturë, rini e sport, dhe është nismëtari i suksesit historik – Lojërat Mesdhetare 2030 në Prishtinë. Tani është koha që këtë përvojë dhe energji ta sjellim në kryeqytet, për një Prishtinë që ecën përpara me zhvillim, drejtësi e dinjitet. Me Hajrulla Çekun dhe VETËVENDOSJE!-n, Prishtina bëhet shembull i qeverisjes për qytetarët”, është shprehur Kurti
