Shtabi Emergjent për Mbrojtje dhe Shpëtim i Komunës së Podujevës ka shpallur gjendjen emergjente për shkak të mbeturinave. Sipas njoftimit të Komunës së Podujevës, gjendja e rënduar me mbeturinat vjenë për shkak të mosbartjes së mbeturinave nga operatorët përgjegjës.
Në njoftimin e Komunës së Podujevës thuhet se gjendja emergjente do të filloj nga data pesë gusht deri më pesë nëntor.
Lidhur me këtë situatë Kryetari i Komunës së Podujevës, Shpejtim Bulliqi,ka thënë se ka disa muaj që menaxhimi me mbeturinat në qytet dhe fshatra të Podujevës është rënduar.
Sipas tij, Kompania Rajonale e Mbeturinave “Pastrimi” për shkak të pamundësisë për të ofruar shërbime në pjesën e përgjegjësisë së saj, më herët ka kërkuar që të lirohet nga shërbimi në fshatra dhe kjo përgjegjësi ka kaluar të Kompania private “Natyra”.
“Por, tash po del që ka probleme për të ofruar këtë shërbim edhe në qytet. Ka raste që operon me një kamion, e ka ditë që nuk ofron shërbim fare. Për shkak të kësaj gjendje që është krijuar, ku tash i kemi edhe mërgimtarët këtu dhe vëllimi i mbeturinave është rritur dhe duke pasur parasysh shëndetin e qytetarëve e kam marr një rekomandim nga Drejtoria e Shërbimeve Publike që të shpallim gjendjen emergjente”, tha kryetari Bulliqi.
Propozimi për shpalljen e gjendjes së jashtëzakonshme u miratua njëzëri.
Bazuar në vendimin e kryetarit të Komunës, Drejtoria e Shërbimeve Publike, Mbrojtje dhe Shpëtim obligohet të hartojë dhe zbatojë planin operacional emergjent për organizimin dhe koordinimin e të gjitha masave emergjente për grumbullimin, transportimin dhe largimin e mbeturinave si dhe inicimin e procedurës së përshpejtuar të prokurimit për sigurimin e 3 kamionëve me qira për bartjen e mbeturinave, duke përfshirë edhe 3 vozitës, të cilët do të operojnë në kuadër të KRM “Pastrimi”.
