Kryeministri i Kosovës, Albin Kurti është shprehur i habitur edhe me faktin që KFOR-i ende nuk ka dhënë një deklaratë zyrtare lidhur me vendin ku ka ndodhur ngjarja.
“Ajo çfarë mua vazhdon të më habisë është fakti që as të nesërmen, me këtë të vërtetë që ne po e shpalosim para juve, nuk del zyrtarisht KFOR-i. Cili është kuptimi që të nesërmen e një ngjarje e cila nuk ishte në mbrëmje por në mesditë, KFOR-i nuk del me një shpjegim zyrtar se ku është ky vend, ky vend qartazi është në Republikën e Kosovës”, ka theksuar Kurti.
Po ashtu gjatë konferencës Kurti ka prezantuar edhe një hartë, nëpërmjet të cilës ka treguar se kidnapimi i policëve të Kosovës ka ndodhur thellë në territorin e Kosovës.
“Nuk bëhet fjalë për arrestim në Serbi, por për kidnapim në Kosovë,nuk bëhet fjalë për kurrfarë kalimi të vijës kufitare nga policët siç pretendohet rrejshëm nga Serbia”, ka theksuar Kurti.
Kurti ka deklaruar se ka biseduar të mërkurën me aleatët amerikanë dhe ka thënë se u ka kërkuar atyre informacione nga KFOR-i mbi ngjarjen e së enjtes.
“Kam biseduar me Gabriel Escobar dhe ambasadorin Jeffrey Hovenier. U kam thënë që pres që KFOR-i të më sjell informacion mua para mbledhjes së Këshillit të Sigurisë e cila u mbajt sot. Mirëpo, asnjë informacion nuk ka ardhur. Në mbledhjen e KS-së sot kemi ardhur me informacionet tona, sipas të cilave është e qartë çfarë ka ndodhur. Ky është cenim i integritetit territorial, i sovranitetit, akt i agresionit”, ka thënë ai.
Tre policë patrollues të kufirit u kidnapuan të mërkurën nga një njësit special i policisë serbe, sipas Policisë së Kosovës, “thellë brenda në territorin e Republikës së Kosovës”. Ata ishin në detyrë, siç u tha, në një pikë statike në vendin e quajtur Tresave/Bare./
