Kryeministri i Kosovës, Albin Kurti, ka kujtuar referendumin e vitit 1991 për pavarësinë e Kosovës, me rastin e 35-vjetorit të mbajtjes së tij, përcjell KosovaPost.
Kurti ka publikuar edhe një fotografi të fletëvotimit të referendumit, duke rikujtuar se votimi ishte mbajtur nga 26 deri më 30 shtator të vitit 1991.
Sipas tij, nga 1,051,357 qytetarë me të drejtë vote, në referendum morën pjesë 914,802 qytetarë, apo 87.01 për qind. Prej tyre, 913,705 votuan për, ndërsa 164 votuan kundër. Ndërkaq, 933 fletëvotime rezultuan të pavlefshme.
Kurti e ka cilësuar referendumin si një ngjarje me rëndësi historike, duke thënë se përmes tij populli i Kosovës shprehu vullnetin për vetëvendosje dhe për një Kosovë sovrane e të pavarur.
Ai ka theksuar se kjo aspiratë, sipas tij, u realizua pas zhvillimeve të viteve në vijim, përfshirë rezistencën paqësore, luftën e Ushtrisë Çlirimtare të Kosovës dhe ndërhyrjen e NATO-s.
“Me mirënjohje, nderim e respekt për të gjitha gjeneratat e aktivistëve që e mirëmbajtën përpjekjen dhe angazhimin e popullit të Kosovës për liri e bashkim, pavarësi e demokraci, për shtet dhe përparim”, ka shkruar Kurti.
