Kryeministri i vendit, Albin Kurti, gjatë seancës së jashtëzakonshme të Kuvendit të Kosovës, ka deklaruar se ndryshimet e propozuara në Ligjin për Dhomat e Specializuara janë bërë me nxitim dhe se, sipas tij, nuk janë analizuar sa duhet.
Kurti tha se ka pasur shumë pak kohë për shqyrtimin e projektligjit dhe kërkoi që çështja të trajtohet më seriozisht.
“Ka qenë një kohë shumë e shkurtër për ta analizuar si duhet ligjin. Ne konsiderojmë se këto lëvizje për ndryshime janë të ngutshme dhe nuk janë analizuar sa duhet. Vendime të ngutshme janë bërë edhe në vitin 2013 dhe 2015, kur është votuar. Atëherë s’na keni dëgjuar. Të paktën sot është dashur të na konsultoni dhe të trajtohet seriozisht”, tha Kurti.
Ai u shpreh se përgjegjësia për problemet me Gjykatën Speciale, sipas tij, duhet t’u adresohet atyre që e kanë themeluar atë, e jo subjekteve që e kanë kundërshtuar.
“Ankesat për gjykatën duhet t’u drejtohen atyre që e themeluan, jo atyre që e kundërshtuan. Përgjegjësinë e mbajnë ata që e themeluan”, deklaroi Kurti.
Kurti tha se Lëvizja Vetëvendosje do ta mbështesë projektligjin, por paralajmëroi se me votën duhet të merret edhe përgjegjësia politike për hapat e mëtejshëm.
“Ne s’po ju pengojmë. Por bashkë me këtë votë duhet ta merrni edhe përgjegjësinë politike. Adresa e fitores është Apeli. Për fitore nevojitet organizim dhe strategji”, tha ai.
Sipas Kurtit, Kosovës i duhet një organizim mbarëkombëtar dhe një strategji e qartë për proceset në Hagë.
” Na duhet strategji serioze për Hagën, por edhe institucione funksionale dhe qeveri stabile”, u shpreh Kurti.
Ai tha se çështja e Hagës nuk mund të trajtohet e shkëputur nga stabiliteti institucional i Kosovës.
“Një ligj për Hagën pa stabilitet institucional dhe pa president rrezikon dështimin. Duhet ligj në Hagë dhe president në Kosovë”, deklaroi Kurti.
Në fund, Kurti falënderoi Hamzën për takimet që i cilësoi konstruktive, duke thënë se do të ketë edhe takime të tjera gjatë ditës.
“Duhet të ecim përpara të gjithë bashkë”, përfundoi Kurti.
