Kryeministri i Kosovës, Albin Kurti, ka deklaruar se siguria energjetike është siguri kombëtare, e sipas tij, Kosova ka kapacitete prodhuese të kufizuara që i takojnë shekullit të kaluar e që s’janë investuar me dekada.
Ai ka shkruar në Facebook të dielën se për dy vjet e gjysmë, Qeveria ka punuar për zgjidhjen afatgjate të çështjes së energjisë, derisa ka theksuar se zgjidhja do të sigurojë një të ardhme me më shumë prodhim, sidomos nga burime të ripërtërishme.
“Këto dy vjet e gjysmë qeverisje, kemi punuar në mënyrë metodike për zgjidhjen afatgjate që meriton vendi ynë. Fillimisht ndamë 120 milionë euro për të siguruar furnizim të rregullt me rrymë dhe për të mbrojtur qytetarët dhe bizneset nga rritja e çmimit të energjisë, të shkaktuar nga kriza energjetike. Pastaj, vendosëm themelet për rritjen e kapaciteteve të prodhimit, duke siguruar 700 milionë euro investime në këtë sektor, në mesin e tyre marrëveshja për bateritë me MCC-në në vlerë prej 237.6 milionë dollarë. Kurse në të njëjtën kohë, kemi nxitur uljen e konsumit të rrymës duke subvencionuar kursimin e saj, dhe rritur efiçiencës përmes masave mbështetëse për pajisje elektrike dhe të ngrohjes. Janë mbi 208 mijë familje kursimtare që kanë përfituar nga subvencionimi i faturave të energjisë, dhe 10 mijë sosh që kanë përfituar nga subvencionimi i blerjes së pajisjeve efiçiente të energjisë. Ndërkaq 67 ndërtesa publike janë rinovuar për efiçiencë energjetike dhe ka filluar puna në realizimin e projektin 80 milionësh për Ngrohje Qendrore me panele solare, përmes së cilit do të ulim konsumin e rrymës për ngrohje dhe do të kujdesemi për ambient të pastër”, thuhet në statusin e tij.
Sipas Kurtit, energjia elektrike është interes kombëtar, derisa ka përmendur se importimi i saj është shumë i shtrenjtë, sidomos gjatë sezonit të dimrit.
