Kryeministri i Kosovës, Albin Kurti, u ka bërë thirrje liderëve politikë dhe deputetëve që të gjejnë një kompromis për zgjedhjen e presidentit të vendit, duke paralajmëruar se një proces i ri zgjedhor do të ishte i panevojshëm dhe në dëm të interesit publik.
Në adresimin e tij në mbledhjen e parë të Qeverisë së re, Kurti tha se Kosova tashmë ka Kuvend të konstituar dhe Qeveri të zgjedhur, ndërsa çështja e presidentit mbetet për t’u zgjidhur.
Ai u shpreh mirënjohës ndaj qytetarëve për besimin e dhënë dhe deputetëve për votimin e Qeverisë, duke theksuar se institucionet e reja kanë përpara shumë punë, projekte dhe sfida.
““Dje në Kuvendin e Republikës së Kosovës u votua qeveria ‘Kurti 4’. Sot zyrtarisht është dita e parë e punës e punës nën qeverisjen e re të dalë nga procesi zgjedhor i 7 qershorit 2026, ndonëse realisht është veçse vazhdim i punës dhe i mandatit të ndërprerë, pa nevojë edhe për vëmendjen tuaj. Mirënjohës qytetarëve për besimin e dhënë, deputetëve të Kuvendit për votimin, urime të gjithëve. Përpara kemi shumë punë e projekte, sfida dhe probleme dhe natyrisht që vetëm bashkarisht do t’i dalim mbanë. Qeverisja jonë e përbashkët është punë për qytetarin dhe mbrojtje për shtetin. Qeveria jonë është shërbim për publikun, jo privilegj për pakicën. Investimet tona do ta lartësojnë Republikën me qytetarë të sigurt dhe do të zhvillojnë shoqërinë me familje të begatë”, tha Kurti.
Kurti rikujtoi zhvillimet politike që çuan në zgjedhjet e 7 qershorit, duke thënë se vendi kishte kaluar nëpër dy procese zgjedhore të njëpasnjëshme, të cilat i cilësoi si të kushtueshme dhe pa rezultat të ri politik.
“Pas zgjedhjeve të rregullta të 9 shkurtit 2025, pas një mandati të plotë qeverisës katërvjeçar, kemi pasur dy palë zgjedhje të paarsyeshme, të kushtueshme dhe që nuk sollën rezultat tjetër. 10 muaj bllokadë e barrikadim për të shkuar në zgjedhjet e 28 dhjetorit 2025. Qytetarët folën qartë para vitit të ri 2026. Por barrikadim sërish për të shkuar përsëri në zgjedhje në 7 qershor 2026. Edhe njëherë qytetarët folën qartë. Në vitin 2025 shkuam në zgjedhje për shkak të barrikadimit për kuvend e qeveri, ndërkaq sivjet në 2026 për shkak të barrikadimit për shkak të presidentit. Sot kur po flasim, jemi me kuvend të konstituar e qeveri të zgjedhur. Ndërkaq përpara kemi çështjen e presidentit dhe një marrëveshje politike mes subjekteve Lëvizja Vetëvendosje dhe Lidhja Demokratike e Kosovës për kandidatin për president”, shtoi Kurti.
Megjithatë, sipas kryeministrit tani sfidë mbetet sigurimi i votave për president, teksa shprehu shqetësimin e tij për qëndrimet e disa deputetëve të LDK-së që, sipas tij, nuk duan ta zbatojnë marrëveshjen politike të arritur mes dy subjekteve.
Para nesh është sfida me qëndrimin e shprehur nga disa deputetë nga radhët e LDK-së, të cilët nuk duan ta zbatojnë marrëveshjen e arritur me mund e përkushtim pas një procesi negociatash jo të lehta të autorizuara nga kryesitë përkatëse të partive tona. Jemi kaq afër zgjidhjes për presidentin saqë do të ishte e pafalshme të shkojmë sërish në zgjedhje për të ardhur përsëri në të njëjtën pikë”, tha kryeministri.
Kurti tha se Kosova është shumë pranë zgjidhjes së çështjes së presidentit dhe se do të ishte e pafalshme që vendi të shkonte përsëri në zgjedhje.
“Andaj si kryeministër i Republikës së Kosovës, por edhe si kryetar i Lëvizjes Vetëvendosje, subjektit politik më të madh në vend e në Kuvend, ju bëj thirrje liderëve politikë, kolegëve të mi, deputetëve, le ta zgjidhim çështjen e presidentit, t’i japim vendit tonë institucionin në përputhje me vullnetin qytetar dhe le të ecim përpara së bashku ashtu siç i takon Republikës sonë e siç presin qytetarët tanë. Jam i bindur që edhe një proces i panevojshëm zgjedhor jo vetëm që nuk do të sjellë diçka të re sa i përket mozaikut politik në vend, por përfundimisht do të ishte papërgjegjësi ndaj interesit publik dhe pamaturi e madhe politike”, nënvizoi Kurti.
Sipas Kurtit, shembull i mundësisë për kompromis politik është vetë konstituimi i Kuvendit.
“Se gjetja e një kompromisi politik është e mundur dhe sjell rezultat është dëshmi vetë konstituimi i Kuvendit. Ne dje pranuam plotësisht kandidaturat për nënkryetarë të Kuvendit nga PDK dhe LDK përkundër vërejtjeve që kishim dhe sot jemi me qeveri të re përveçse Kuvend të konstituuar. Një diskutim politik mes nesh, i hapur dhe i sinqertë jam i bindur që do t’i sjellë vendit presidentin e ri”, theksoi Kurti.
