Kusari-Lila mori pjesë në aktivitetin e organizuar nga Këshilli i Investitorëve Evropianë, në bashkëpunim me Ambasadën e Republikës së Kroacisë në Kosovë, në prag të Ditës së Biznesit Kroat në Kosovë.
Aktiviteti bashkoi komunitetet e biznesit të Kosovës dhe Kroacisë, me pjesëmarrjen e ambasadores së Kroacisë në Kosovë, Danijela Barishiq, dhe drejtorit ekzekutiv të Këshillit të Investitorëve Evropianë, Emrush Ujkani.
“Aktualisht, në Kosovë operojnë 77 biznese kroate. Përmes aktiviteteve të përbashkëta promovuese dhe krijimit të mundësive të reja për investime, synojmë që ky numër të rritet më tej”, ka thënë Kusari-Lila.
Sipas saj, eksportet e Kosovës drejt Kroacisë janë rritur me 17 për qind krahasuar me vitin paraprak, ndërsa importet kanë shënuar rënie prej 11 për qind.
“Megjithatë, në vlerë absolute, bilanci tregtar mes dy vendeve vazhdon të jetë në deficit për Kosovën. Kjo tregon se ka ende hapësirë të madhe për rritjen e eksporteve tona dhe për një shkëmbim më të balancuar tregtar”, ka deklaruar ajo.
Kusari-Lila ka thënë se Kosova dhe Kroacia kanë një marrëdhënie të ndërtuar mbi miqësi, respekt dhe solidaritet, e cila ka edhe një dimension të rëndësishëm ekonomik.
“Me Kroacinë ndajmë një pjesë të historisë sonë, vlera të përbashkëta dhe kujtesën e mbështetjes së shtetit kroat në çlirimin dhe shtetndërtimin e Kosovës. E vlerësojmë po aq edhe mbështetjen e Kroacisë në rrugëtimin tonë evropian dhe në zhvillimin e marrëdhënieve tona ekonomike”, ka thënë ajo.
“Miqësia ndërtohet ndër vite, ndërsa bashkëpunimi ekonomik e forcon dhe e bën atë edhe më të qëndrueshme”, ka përfunduar Kusari-Lila.
