Ministrja e Industrisë, Ndërmarrësisë, Tregtisë dhe Inovacionit, Mimoza Kusari-Lila, zhvilloi një takim me përfaqësues të Forumit të Young Global Leaders në Qendrën Inovative të Kosovës (ICK), ku diskutoi për potencialin ekonomik të Kosovës dhe mundësitë për lidhjen e ekonomisë së vendit me tregjet globale.
Gjatë bashkëbisedimit u diskutua për potencialin që Kosova ka në zhvillimin ekonomik, duke përfshirë fuqinë punëtore të re dhe të aftë, sektorin privat në rritje, diasporën dhe ekosistemin gjithnjë e më të zhvilluar në teknologji, inovacion dhe ndërmarrësi.
Ministrja Kusari-Lila theksoi se sfida kryesore është që ky potencial të shndërrohet në më shumë investime, vende pune cilësore dhe produkte e shërbime me vlerë të shtuar. Ajo nënvizoi se Kosova duhet të synojë të konkurrojë jo vetëm përmes kostos së punës, por mbi të gjitha përmes talentit, teknologjisë, produktivitetit dhe inovacionit.
Në takim u diskutua edhe për sfidat që ndikojnë në vendimet për investime, përfshirë perceptimin lidhur me sigurinë dhe besueshmërinë. Në këtë drejtim, u theksua rëndësia që partnerëve ndërkombëtarë t’u prezantohen jo vetëm potencialet e Kosovës, por edhe hapat konkretë që po ndërmerren për krijimin e një mjedisi më të favorshëm për biznes dhe investime.
Ministrja Kusari-Lila përcolli mesazhin se Kosova është e hapur për investime dhe partneritete nga e gjithë bota, duke theksuar se edhe vendet që ende nuk e kanë njohur Republikën e Kosovës janë të mirëpritura të investojnë, të krijojnë partneritete dhe të jenë pjesë e zhvillimit ekonomik të vendit.
Young Global Leaders është një rrjet global i lidhur me Forumin Ekonomik Botëror, i cili që nga viti 2004 bashkon liderë të rinj nga politika, biznesi, teknologjia, akademia dhe fusha të tjera. Rrjeti krijon mundësi për shkëmbim të ideve, bashkëpunim dhe zhvillim të iniciativave me ndikim, ndërsa sot përfshin mbi 1,400 liderë nga më shumë se 120 vende.
Për Kosovën, lidhjet me një rrjet të tillë përbëjnë mundësi për shkëmbim të dijes dhe ideve, krijimin e partneriteteve të reja dhe tërheqjen e investimeve.
Në këtë drejtim, Ministria e Industrisë, Ndërmarrësisë, Tregtisë dhe Inovacionit mbetet e fokusuar në krijimin e mundësive që potenciali i Kosovës të shndërrohet në rezultate konkrete, duke e bërë ekonominë digjitale pjesë të zhvillimit të tashëm të vendit.
