Ministrja e Ministria e Industrisë, Ndërmarrësisë dhe Tregtisë, Mimoza Kusari-Lila, ka reaguar në Kuvendin e Kosovës ndaj kritikave të opozitës për projektligjin për çmimet tavan, duke theksuar se disa prej pikave kryesore po keqinterpretohen.
Ajo sqaroi se ligji nuk synon të përcaktojë çmimet për të gjithë tregun, por vetëm në raste të jashtëzakonshme dhe për produkte bazike.
“Keqinterpretimi i parë ka të bëjë me mënyrën se si po paraqitet ky ligj, sikur do të përcaktojë çmimet për të gjithë tregun. Në fakt, ai aktivizohet vetëm në situata të destabilizimit dhe vetëm për 14 produkte bazë që synojnë mbrojtjen e kategorive më të ndjeshme”, deklaroi Kusari-Lila.
Sipas saj, ndërhyrja është e kufizuar dhe nuk përfshin të gjitha produktet në treg.
“Nuk bëhet fjalë për ndërhyrje të përgjithshme në çmime nëpër markete, por vetëm për një listë të caktuar produktesh dhe nënproduktesh të miratuara sipas projektligjit, për të cilat vendos Bordi”, shtoi ajo.
Ministrja theksoi se qëllimi kryesor i këtij projektligji është mbrojtja e qytetarëve që janë më të prekur nga rritja e çmimeve.
“Ky ligj është hartuar pikërisht për të mbrojtur ata që kanë më së shumti nevojë në kushte të luhatjeve të tregut”, u shpreh ajo.
Ajo foli edhe për çështjen e pavarësisë së Bordit, duke akuzuar opozitën për qëndrime kontradiktore.
“Po krijohet konfuzion rreth rolit të Bordit dhe kompetencave të shtetit. Në një anë kërkohet pavarësi, në anën tjetër vihet në pikëpyetje roli i Qeverisë”, tha Kusari-Lila.
Duke iu referuar vendimit të Gjykata Kushtetuese e Kosovës, ajo theksoi se Qeveria nuk mund të ketë kompetenca të plota në përcaktimin dhe mbikëqyrjen e çmimeve.
“Gjykata Kushtetuese ka sqaruar se Qeveria nuk mund të vendosë, zbatojë dhe mbikëqyrë njëkohësisht çmimet, pasi këto funksione kërkojnë mekanizma të pavarur”, deklaroi ajo.
Sipas saj, zgjidhja më e përshtatshme ka qenë krijimi i Bordit me mandat të qartë dhe përzgjedhje transparente.
“Bordi përzgjidhet përmes konkursit të hapur, propozohet nga Qeveria dhe votohet në Kuvend, duke garantuar kështu legjitimitet dhe balancë”, tha Kusari-Lila.
Ajo shtoi se roli i Qeverisë mbetet mbështetës në aspektin administrativ.
“Qeveria ofron mbështetje përmes sekretariatit, duke shmangur krijimin e strukturave të reja me kosto të lartë. Anëtarët e Bordit angazhohen dhe paguhen vetëm kur janë aktivë”, përfundoi ajo
