Klubi anglez, Manchester United, nuk ka fituar asnjë ndeshje europiane prej një viti të tërë pas barazimit 1-1 kundër Fenerbahce të enjten mbrëma.
Hera e fundit që “Djajtë e Kuq” fituan një ndeshje në Europë ishte 1-0 ndaj FC Copenhagen (24 tetor 2023) në fazën e grupeve të Ligës së Kampionëve në sezonin 2023-2024.
Që atëherë, ata janë në një seri prej gjashtë ndeshjesh pa fitore në të gjitha garat europiane.
Klubi nga “Old Trafford” ka humbur dy dhe ka barazuar një nga tre ndeshjet e fundit të Ligës së Kampionëve sezonin e kaluar.
Në këtë sezon në Ligën e Europës, United ka barazuar të tria ndeshjet e luajtura.
Ata janë gjithashtu në vendin e 21-të në tabelën e Ligës së Europës.
Hera e fundit që “Djajtë e Kuq” shkuan në një ecuri prej gjashtë ndeshjesh pa fitore në garat europiane ishte në periudhën 1980-1983.s.n.
