Ministri i Mbrojtjes, Ejup Maqedonci, ka pritur sot në takim ambasadorin e Gjermanisë në Kosovë, Rainer Rudolph.
Maqedonci bëri të ditur se me ambasadorin gjerman ka diskutuar për situatën e sigurisë në Kosovë dhe më gjerë, si dhe për zhvillimet në fushën e mbrojtjes.
Në fokus të takimit, sipas tij, ishte dinamika e zhvillimit të Forcës së Sigurisë së Kosovës dhe bashkëpunimi me Gjermaninë, me theks në aktivitetet e përbashkëta trajnuese e stërvitore.
Po ashtu, është diskutuar për mundësitë e bashkëpunimit në industrinë e mbrojtjes dhe prokurimet ushtarake.
Maqedonci tha se ky bashkëpunim kontribuon në rritjen e kapaciteteve dhe ndërveprueshmërisë së FSK-së me partnerët, duke e forcuar rolin e Kosovës në kontributin për paqen, sigurinë dhe stabilitetin.
“Gjermania mbetet një partner i rëndësishëm i Kosovës në rrugëtimin tonë për ndërtimin e një force moderne, profesionale dhe të aftë për të kontribuar në sigurinë kolektive”, ka shkruar Maqedonci.
