Sulmues i Real Madridit nga 1984 në 1987, Jorge Valdano, ka qenë edhe trajneri i Los Blancos për dy vite (nga 1994 dhe 1996) dhe në intervistën e dhënë për Süddeutsche Zeitung ka analizuar situatën aktuale të klubit spanjoll.
Në lidhje me vështirësitë e para të Kylian Mbappe te Real Madrid: “Është një çështje përshtatjeje. Mbappe ka lënë për herë të parë vendin e tij, Francën, dhe kjo e ka nxjerrë automatikisht nga zona e tij e rehatisë. Kjo mund t’i ketë sjellë ankth dhe ankthi është armiku numër një i një futbollisti”.
Në lidhje me fatin e Carlo Ancelotti-t në drejtim të Real Madrid: “Nuk ka rëndësi si quhet trajneri i Real Madrid, është gjithmonë në një pozicion delikat dhe tri ndeshje larg krizës. Po flasim për trajnerin aktual fitues të kampionatit dhe të Champions League”.
Në lidhje me Xabi Alonso: “Xabi Alonso ka një avantazh të madh: nuk e lë merkaton ta detyrojë të bëjë asgjë. Pjesa më e madhe e njerëzve donin që të largohej, por ai qëndroi te Leverkusen.
“Zgjedh kohët e tij, gjë që tregon qartë personalitetin e tij. Megjithatë, duhet të them një gjë: kam ndjesinë se kudo që do të dojë të shkojë, dera do të jetë hapur për të në këtë moment”.s.n.
