Lëvizja Vetëvendosje ka shprehur mbështetjen për “Marshin për Liri”, i cili do të mbahet më 12 shtator në Prishtinë, përcjell KosovaPost.
Në një reagim të publikuar të premten, LVV ka kritikuar themelimin e Gjykatës Speciale, duke e cilësuar atë si “dëmin më të madh” ndaj historisë së luftës çlirimtare dhe themeleve të shtetit të Kosovës.
Sipas LVV-së, krijimi i kësaj gjykate ka vendosur një rend të jashtëzakonshëm gjyqësor që, sipas tyre, është i fokusuar ndaj pjesëtarëve të UÇK-së, ndërsa Serbia dhe përgjegjësit e saj për krimet e kryera në Kosovë kanë mbetur jashtë këtij mekanizmi.
LVV ka kritikuar edhe mënyrën se si, sipas saj, u krijua Gjykata Speciale, duke përmendur raportin e Dick Martyt dhe nismën e vitit 2008 në Këshillin e Evropës. Partia ka pretenduar se akuza për trafikim organesh ndikoi në krijimin e një klime politike që çoi drejt themelimit të gjykatës.
Në reagim thuhet gjithashtu se ndryshimet kushtetuese për themelimin e saj janë bërë nën trysni dhe se paraburgimi shumëvjeçar i të akuzuarve është shndërruar në “dënim para aktgjykimit”.
LVV ka kërkuar nga deputetët që e votuan themelimin e Gjykatës Speciale të distancohen nga vota e tyre, ta pranojnë atë që e cilëson si gabim dhe t’u kërkojnë falje qytetarëve të Kosovës, luftëtarëve të UÇK-së dhe familjeve të tyre.
“Më 12 shtator marshojmë kundër atyre që e themeluan Gjykatën Speciale dhe për lirinë, drejtësinë, të vërtetën e luftës sonë çlirimtare”, thuhet në reagimin e Lëvizjes Vetëvendosje.
