Dhomat e Specializuara në Hagë bëjnë të ditur se më 27 shkurt do të mbahen deklaratat hyrëse në gjykimin e Hashim Thaçi, Bashkim Smakaj, Isni Kilaj, Fadil Fazliu dhe Hajredin Kuçi, në lidhje me akuzat për pengim të drejtësisë.
Sipas aktakuzës, të pesë të akuzuarit dyshohen se gjatë periudhës prill-nëntor 2023 kanë ndikuar në dëshmitë e dëshmitarëve të thirrur nga Prokuroria për çështjen gjyqësore “Thaçi dhe të tjerët”. Aktakuza, e konfirmuar nga gjykata më 29 nëntor 2024, thekson se Thaçi u dha informacion konfidencial bashkëpunëtorëve të tij dhe i udhëzoi ata për të ndërhyrë në dëshmitë e dëshmitarëve.
Ndërsa të pesë të akuzuarit janë vetëdeklaruar të pafajshëm. Pas deklaratave hyrëse, Prokuroria do të nisë prezantimin e provave të saj.
Thaçi akuzohet gjithashtu për krime lufte dhe krime kundër njerëzimit, së bashku me ish-eprorët e UÇK-së: Kadri Veseli, Rexhep Selimi dhe Jakup Krasniqi, të cilët i kanë mohuar akuzat.
Ndryshe dje kanë përfunduar deklaratat përmbyllëse, ku mbrojtja argumentoi mungesën e provave të mjaftueshme, ndërsa Prokuroria kërkoi shpalljen e tyre fajtorë.
Pas përmbylljes së procesit, çështja do t’i kalojë trupit gjykues, i cili ka afat tre muaj për të dhënë vendimin ose mund të kërkojë zgjatje të këtij afati.
Ky njoftim vjen në ditën e 18-vjetorit të e Pavarësisë së Kosovës, ku u mbajt edhe një protestë me moton “drejtësi jo politik”.
