Me ndërhyrjen e kryeministrit kroat, Andrej Plenkoviq, janë ndryshuar konkluzionet e Këshillit Evropian për anëtarësimin e Malit të Zi në Bashkimin Evropian (BE), nga të cilat janë hequr afatet për mbylljen e përkohshme të kapitujve negociues dhe për përfundimin e hartimit të traktatit të anëtarësimit, raportojnë mediat kroate.
Gjatë diskutimit për zgjerimin e BE-së, Plenkoviq i informoi liderët e shteteve anëtare për tetë kërkesat e Kroacisë që Mali i Zi duhet t’i përmbushë për të siguruar mbështetjen e Zagrebit për përfundimin e negociatave të anëtarësimit.
Në konkluzionet përfundimtare thuhet se Këshilli Evropian mbështet punën për hartimin e traktatit të anëtarësimit me Malin e Zi dhe merr në dijeni synimin e presidencës irlandeze të Këshillit të BE-së për të vazhduar punën për mbylljen e përkohshme të kapitujve negociues, me kusht që Podgorica të zbatojë reformat përkatëse.
Në draftin e mëparshëm të konkluzioneve ishte parashikuar që marrëveshja për mbylljen e përkohshme të të gjithë kapitujve negociues të arrihej deri në fund të këtij viti, si dhe që hartimi i traktatit të anëtarësimit të përfundonte sa më shpejt. Të dyja afatet kohore u hoqën pas ndërhyrjes së Plenkoviqit.
Kryeministri kroat deklaroi se Zagrebi ka një qasje konstruktive dhe dashamirëse ndaj integrimit evropian të Malit të Zi, por pret zgjidhjen e çështjeve të hapura, të cilat, siç tha ai, kanë qenë prej kohësh në rendin e ditës së marrëdhënieve dypalëshe.
Këtë javë, Kroacia u dërgoi shteteve anëtare të BE-së, si dhe kabineteve të presidentes së Komisionit Evropian dhe presidentit të Këshillit Evropian, një dokument në të cilin shpjegoi në detaje qëndrimin e saj për procesin e anëtarësimit të Malit të Zi.
Në dokument janë paraqitur tetë kërkesa që Podgorica duhet t’i përmbushë për të marrë dritën jeshile të Zagrebit për përfundimin e negociatave. Gjashtë kërkesa lidhen me Kapitullin 23 të negociatave, i cili përfshin gjyqësorin dhe të drejtat themelore, ndërsa dy të tjerat lidhen me Kapitullin 31, që ka të bëjë me politikën e jashtme, të sigurisë dhe të mbrojtjes.
Me ndryshimet në konkluzionet u hoqën afatet konkrete për përparimin e negociatave, ndërsa vazhdimi i procesit të anëtarësimit të Malit të Zi në BE mbetet i kushtëzuar nga zbatimi i reformave të nevojshme.
Mali i Zi, i cili i nisi negociatat e anëtarësimit me BE-në në vitin 2012, konsiderohet një nga vendet kandidate më të përparuara, ndërsa marrëdhëniet me Kroacinë rëndohen nga çështje dypalëshe të pazgjidhura, përfshirë çështjen e pronësisë së anijes shkollore “Jadran”, dëmshpërblimet për ish-të burgosurit e kampeve dhe çështjen e kufirit./trt
