Ministri i Sigurisë Kombëtare i Izraelit, Itamar Ben-Gvir, ka publikuar një video nga ndërtimi i një qendre për varjen e të dënuarve me vdekje, ku palestinezët e dënuar për akuza që lidhen me terrorin – por jo ekstremistët hebraikë të akuzuar për krime të ngjashme – do të varen.
Ben-Gviri, i cili në të kaluarën ka qenë në shënjestër të sanksioneve dhe dënimeve ndërkombëtare për aktivitetet e tij, tha se qendra e re e ekzekutimeve do të jetë e pajisur me kabina për shikues që familjet e viktimave ta shikojnë varjen e të dënuarit, raporton gazeta “The Guardian”.
Ai në rrjete sociale publikoi një video nga vizita që ia kishte bërë lokacionit të paidentifikuar, ku ai mund të shihet duke bërë me shenjë drejt themelit që po ndërtohej dhe duke thënë me mburrje se ai ishte vendi ku “terroristët do të ekzekutohen”.
Në fotografitë e publikuara nga mediat izraelite u panë një buldozer dhe puna e ndërtimit të vrazhdë në një zonë të rrethuar, siç thuhet, afër një burgu.
“Unë premtova se do t’i përkeqësonim kushtet e terroristëve në burgje, e mbajtëm atë [premtim]. Unë premtova se do të miratohej ligji Dënim me Vdekje për Terroristët – e bëmë. E tani, qendra për varje dhe pritje të dënimit me vdekje gjithashtu po fillon të marrë formë” – tha Ben-Gviri.
Raportet për ndërtimin e qendrës për ekzekutimin vetëm të palestinezëve të dënuar për shkelje që lidhen me terrorin në sistemin e gjykatave ushtarake vijnë pas miratimit të një ligji të ri më herët këtë vit. Me këtë ligj, gjykatave ushtarake u kërkohet zbatimi i dënimit me vdekje si dënimi i vetëm i mundshëm, përpos nëse gjykata gjen rrethana të posaçme që do ta lejonin shqiptimin e dënimit me burgim të përjetshëm.
Në maj, ministri Ben-Gvir e festoi ditëlindjen e tij të 50-të me një tortë dhuratë, e dekoruar me simbolin e litarit për varje.
