Ministri i Mbrojtjes së Serbisë, Millosh Vuçeviq përgënjeshtroi lajmet se “sipas dokumenteve sekrete të zbuluara nga Pentagoni, Serbia ka dërguar armë në Ukrainë” dhe tha se “Serbia nuk i ka shitur dhe nuk do t’i shesë armë qoftë Ukrainës apo Rusisë”, transmeton Kosova Post.
Në lajmin e publikuar në “Reuters” dhe “Guardian”, thuhet se dokumentet sekrete të Departamentit të Mbrojtjes së SHBA-së për luftën në Ukrainë përfshinin informacionin se Serbia refuzoi kërkesën për të trajnuar forcat ukrainase, por pranoi të dërgonte armë në Ukrainë.
Lidhur me këto pretendime, ministri i Mbrojtjes, Vuçeviq tha: “Sa herë po bëhen lajme të rreme se Serbia i shet armë Ukrainës. Dikush dëshiron ta tërheqë vendin tonë në konflikt, por ne nuk do të përfshihemi në të”.
“Dëshiroj të përsëris edhe një herë se Serbia nuk i ka shitur dhe nuk do t’i shesë armë as Ukrainës dhe as Rusisë. Serbia nuk do të dërgojë armë në asnjë vend që lidhet me luftën në fjalë”, tha ai.
Vuçeviq theksoi se armët mund të kenë arritur në Ukrainë në mënyrë indirekte, por kjo nuk ka të bëjë fare me Serbinë dhe e cilësoi si “spekulim të rremë” çdo lajm që thotë se Serbia ka dërguar armë në Ukrainë.
Në lajmet në mediat lokale mëngjesin e sotëm, u vu re se në dokumentet konfidenciale të nënshkruara më 2 mars, 38 shtete janë përgjigjur me titullin “ndihma ushtarake” për Ukrainën dhe se Serbia ishte në listën e “vendeve që dërguan ose do të dërgojnë armë”./aa