Sot në Kosovë pritet të mbajë mot relativisht i ngrohtë, me vranësira dhe intervale kohore me diell si dhe me erëra nga jugu dhe jugperëndimi.
Pasdite shtim i mëtutjeshëm i vranësirave e në mbrëmje vonë ndryshim drastik i motit pritet të fillojnë reshjet e shiut. Me depërtimin e frontit të ftohtë vonë në mbrëmje pritet të fillojnë reshjet e borës.
Temperaturat maksimale pritet të arrijnë deri në 10 gradë Celsius ditën para frontit, për të pësuar ulje të ndjeshme në mbrëmje vonë me depërtimin e frontit të ftohtë ajror me reshje bore.
Në Shqipëri nesër pritet të ketë shtim të vranësirave, por në shumë zona edhe intervale kohore me diell. Gjatë ditës mund të ketë riga lokale shiu kryesisht të dobëta, ndërsa në mbrëmje në veri reshje të dendura shiu e në male reshje të dendura bore. Gjatë natës reshje do të shtrihen nga veriu në drejtim të jugut. Priten rrebeshe intensive shiu , por të cilat nuk zgjasin shumë. Në veri dhe lindje reshje bore.
Në Maqedoninë Veriore nesër pritet të mbajë mot me vranësira e intervale kohore me diell. Vende-vende mund të ketë ndonjë rigë të dobët shiu. Në mbrëmje vonë ose afër mesnatës fronti i ftohtë sjellë reshje shiu e në viset kodrinore-malore reshje lokale bore. Reshje bore mund të ketë edhe në disa zona të ulëta në Maqedoni në fund të reshjeve. Temperaturat shënojnë ulje vetëm natën vonë pas frontit të ftohtë.
Ngjashëm sikur në Maqedoni pritet të ndodhë edhe në Luginë të Preshevës, ndërsa në Mal të Zi reshjet do të fillojnë shumë më herët. Në jug kryesisht rrebeshe shiu, ndërsa në veri të Malit të Zi do të fillojnë reshje të dendura bore.
Të Shtunën na pret mot mjaft i ftohtë dimëror, ndërsa reshjet e borës pushojnë në mëngjes ose paradite, pasojnë kthjellime të pjesshme. Temperaturat do të pësojnë ulje të ndjeshme, ndërsa acar i fortë pritet natën ose mëngjesin e hershëm të së dieles sidomos nëse do të ketë kthjellim të plotë të motit. Temperaturat minimale mund të ulen deri në -9 Gradë Celsius.
