Deputeti i Lëvizjes Vetëvendosje, Hekuran Murati ka shkruar se kur vendet mund të kenë qeveri tranzicionale, ashtu siç ka propozuar një ditë më parë në letrën kthyese për liderin e LVV-së, Albin Kurti, Lumir Abdixhiku i LDK-së, përcjell KosovaPost.
Murati që u zgjodh deputet në zgjedhjet e 9 shkurtit e ka quajtur skandaloz propozimin e kreut të LDK-së, derisa sipas tij qeveritë tranzicionale bëhen të nevojshme në rastet kur një vend sapo ka dalë nga lufta, kur ka kolaps të sistemit politik (revolucion), kur ka zgjedhje me rezultat të kontestuar, apo kur vendi gjendet në situatë të kryengritjes ose luftës civile.
“Propozimi i Lumir Abdixhikut për një qeveri të tillë për Kosovën është skandaloz, dhe do të ishte mesazhi më i keq që do të mund t’i dërgohej bashkësisë ndërkombëtare. Republika e Kosovës ka Qeveri në detyrë, e cila ushtron funksionin kushtetues deri në zgjedhjen e qeverisë së re. Nuk ka nevojë për eksperimente që na kthejnë në kohën e UNMIK-ut. Ajo çfarë po i mungon aktualisht Republikës së Kosovës është Kuvendi i konstituuar, proces që po bllokohet nga opozita. Shiheni se çfarë shembuj të “qeverive tranzicionale” ofron ChatGPT:”, ka shkruar Murati derisa ka bashkuar edhe një fotografi të nxjerrë nga shembujt e dhënë në ChatGPT.
