Gjermania, Polonia, Britania e Madhe, Franca dhe Italia, fuqitë më të mëdha europiane në NATO, u zotuan të implementojnë sa më shpejt që të jetë e mundur objektivët e rinj për armatimet dhe numrin e trupave, që pritet të aprovohen nga aleanca.
NATO përballet me presion të shtuar jo vetëm për shkak të lutës ruse në Ukrainë, por edhe thirrjeve të Presidentit të zgjedhur amerikan Donald Trump që anëtarët të shpenzojnë më shumë për mbrojtjen. Në samitin që do të mbahet në Hagë në muajin qershor pritet të kërkohet rritja e targetit prej 2% të prodhimit të brendshëm bruto për shpenzime ushtarake, teksa republikani ka kërkuar së fundmi që ai të shkojë në 5%.
Duke folur pas takimit me 4 homologët e tij, ministri gjerman i Mbrojtjes, Boris Pistorius, mirëpriti vendimin e NATO-s për të prezantuar objektivët e rinj sa i përket kapaciteteve ushtarake në qershor, ndryshe nga plani fillestar për në muajin tetor: “Ne po themi kolektivisht se fokusi ynë duhet të jetë zbatimi sa më i shpejtë i objektivave lidhur me kapacitetet e NATO-s, të cilat do të miratohen në verë. Cilat janë këto objektiva? Janë trupat, armatimet, sistemet dhe formacionet e nevojshme për të arritur qëllimet e përcaktuara për një mbrojtje dhe parandalim efektiv dhe të suksesshëm. Meqenëse NATO ka vendosur, me kërkesën tonë, t’i prezantojë ato në qershor dhe jo në tetor, kjo na jep shumë kohë dhe ne mund ta nisim zbatimin shumë më herët”.
Ndërkohë, Sekretari i Përgjithshëm i NATO-s, Mark Rutte, i bëri thirrje Bashkimit Europian të hënën të rimendojë prioritetet në shpenzime, në mënyrë që të fuqizohen buxhetet e mbrojtjes, shkruan A2CNN. Megjithatë, pavarësisht shqetësimeve në rritje lidhur me ardhjen në pushtet të Trump, i cili ka kërcënuar pavarësinë e Kanadasë dhe nuk ka përjashtuar marrjen me forcë të Kanalit të Panamasë ose Groenlandës, Rutte këmbënguli se Europa është ende e lidhur me SHBA për nevojat e saj të sigurisë. Ai tha se është një iluzion të mendohet se mund t’ia dalin të vetëm sa i përket mbrojtjes.
