Deri më tani janë konfirmuar 35 raste dhe tre raste të vdekjes nga ethet e Nilit Perëndimor në Maqedoninë e Veriut, njoftoi ministri i Shëndetësisë i vendit, Sasho Klekovski, raporton Anadolu, transmeton KosovaPost.
Në konferencën e sotme për media, Klekovski informoi lidhur me situatën me ethet e Nilit Perëndimor në Maqedoninë e Veriut.
“Për momentin kemi 35 raste të konfirmuara dhe tre raste të dyshuara për ethet e Nilit Perëndimor, të cilat janë në proces diagnostikimi, ndërsa gjashtë persona janë në gjendje kritike dhe ndodhen në kujdes intensiv në Klinikën Infektive. Nga rastet e konfirmuara, shumica janë të shtruar në Klinikën për Sëmundje Infektive, ndërsa një pacient po trajtohet në një institucion shëndetësor privat”, tha Klekovski.
Sipas ministrit, deri më tani janë shënuar tre raste të vdekjes nga ky virus, ndërsa 15 persona janë shëruar dhe janë liruar nga Klinika për Sëmundje Infektive.
Ai theksoi se për momentin kryeqyteti i Greqisë, Athina, është zona më aktive në Evropë sa i përket etheve të Nilit Perëndimor, ndërsa raste tashmë ka edhe në zonat kufitare me Maqedoninë e Veriut.
“Janë informuar tashmë të gjitha repartet infektive, mjekët amë, mjekët familjarë, Klinika e Neurologjisë, si dhe neurologët në përgjithësi, kështu që gatishmëria dhe kapaciteti për njohjen dhe diagnostikimin janë të pranishme”, theksoi Klekovski.
– Virusi i Nilit Perëndimor
Për mbrojtjen nga virusi i Nilit Perëndimor, i cili më së shpeshti transmetohet përmes pickimit të mushkonjave të gjinisë “Culex”, nuk ka vaksinë të disponueshme dhe rekomandohet mbrojtja nga pickimet e mushkonjave.
Periudha e inkubacionit nga momenti i pickimit të mushkonjës zakonisht zgjat nga 2 deri në 14 ditë ndërsa te personat me imunitet të dobësuar kjo periudhë mund të zgjatet deri në 21 ditë.
Rreth 80 për qind e personave të infektuar me virus nuk shfaqin asnjë simptomë ndërsa te rreth 20 për qind e pacientëve mund të shfaqen simptoma si temperaturë, dobësi, të përziera dhe të vjella, dhimbje koke dhe dhimbje muskulore.
Rastet me virusin e Nilit Perëndimor regjistrohen më së shpeshti në Afrikë, Evropë, Lindjen e Mesme, Amerikën e Veriut dhe Azinë Perëndimore.
