Shkruan: Fadil Pushkolli
Deklarata e kryeministrit Albin Kurti se në Hagë nuk po përndiqen vetëm individë dhe se mbrojtja e krerëve të UÇK-së kërkon bashkërendim nga shteti, meriton të mos mbetet vetëm një deklaratë politike.
Kryeministri Kurti tha qartë se “UÇK-ja nuk ka qenë e asnjërit, por e të gjithëve dhe të gjithë duhet ta mbrojmë atë”. Kjo është një ide që duhet të trajtohet seriozisht nga të gjitha partitë politike, veçanërisht nga ato që deklarohen publikisht se e kanë prioritet lirimin dhe mbrojtjen e krerëve të UÇK-së që po përballen me proceset në Hagë.
Në këtë pikë, topi është edhe në fushën e kryetarit të PDK-së, Bedri Hamza.
Nëse PDK-ja dhe Hamza e kanë seriozisht çështjen e lirimit dhe mbrojtjes së krerëve të UÇK-së, atëherë nuk mjaftojnë deklaratat në konferenca për media apo në tubime politike. Është koha që kjo çështje të kthehet në një iniciativë konkrete shtetërore dhe gjithëpërfshirëse.
Hamza mund ta marrë deklaratën e Kurtit si pikënisje dhe të propozojë një takim institucional me kryeministrin, me qëllim që të shqyrtohet themelimi i një grupi shtetëror për bashkërendimin e mbrojtjes së çështjes së UÇK-së në Hagë, natyrisht duke respektuar pavarësinë e avokatëve dhe të proceseve gjyqësore.
Kjo nuk do të nënkuptonte ndërhyrje në drejtësi dhe as ndërhyrje në punën e ekipeve mbrojtëse. Përkundrazi, do të nënkuptonte koordinim të ekspertizës juridike, dokumentacionit historik, dëshmive, arkivave dhe argumenteve që mund të jenë të rëndësishme për proceset.
Krerët e UÇK-së kanë avokatët e tyre. Por pyetja është: a duhet Kosova të ketë edhe një mekanizëm shtetëror që koordinon mbështetjen institucionale dhe dokumentare për këto procese?
Nëse përgjigjja është po, atëherë nuk ka arsye që kjo çështje të mbetet peng i përplasjeve partiake.
Madje, pikërisht këtu do të duhej të shihej dallimi mes interesit partiak dhe interesit shtetëror.
UÇK-ja nuk ishte pronë e një partie. Nuk ishte pronë e PDK-së, e LDK-së, e Vetëvendosjes apo e ndonjë subjekti tjetër politik. Ishte luftë për çlirimin e Kosovës.
Prandaj, edhe mbrojtja e së vërtetës historike për luftën e UÇK-së nuk duhet të jetë monopol i askujt.
Nëse Albin Kurti e ka hedhur këtë ide, Bedri Hamza duhet ta elaborojë.
Le të ulen bashkë. Le ta diskutojnë seriozisht. Le të ftohen edhe ekspertë juridikë, historianë, përfaqësues institucionalë dhe familjarë të të akuzuarve.
Nëse ekziston vullneti politik, mund të gjendet edhe forma institucionale.
Sepse në fund të fundit, pyetja nuk është se kush do ta marrë meritën politike për këtë iniciativë.
Pyetja është shumë më e madhe:
A është Kosova e gatshme të bëjë gjithçka që është e ligjshme dhe institucionalisht e mundshme për të mbrojtur të vërtetën e luftës së saj çlirimtare dhe për t’u qëndruar pranë njerëzve që po përballen me drejtësinë në Hagë?
Nëse përgjigjja është po, atëherë është koha të veprohet.
Jo më shumë deklarata. Më shumë bashkërendim, më shumë dokumente, më shumë ekspertizë dhe më shumë shtet.
Sepse UÇK-ja ishte e të gjithëve.
Dhe kur bëhet fjalë për mbrojtjen e së vërtetës së saj, Kosova duhet të jetë bashkë.
