Të martën, më 30 shtator, përfundon zyrtarisht masa e përkohshme e vendosur nga Gjykata Kushtetuese e Kosovës, e cila prej datës 5 shtator ka pezulluar të gjitha veprimet dhe vendimet e Kuvendit të Kosovës – përfshirë edhe procedurat për formimin e Qeverisë së re.
Masa ishte vendosur pas ankesës së paraqitur nga Lista Serbe, e cila kundërshtoi mënyrën e zhvillimit të seancës konstituive të Kuvendit, për shkak se ajo u shpall e përfunduar pa zgjedhjen e nënkryetarit nga komuniteti serb, siç parashihet me Kushtetutë.
Në një deklaratë publike më 9 shtator, Presidentja Vjosa Osmani u zotua se sapo të përfundojë masa e përkohshme, ajo do të ndërmarrë veprimin kushtetues për caktimin e mandatarit për formimin e qeverisë.
“Vendimi për masën e përkohshme nuk paragjykon vendimin përfundimtar për rastin, por ndërkohë ndalon çdo veprim institucional që lidhet me zgjedhjen e qeverisë. Me përfundimin e kësaj mase, do të ftoj partinë e parë për të vazhduar me procedurat e zakonshme”, u shpreh Osmani.
Ndërkohë, Kryetari i Kuvendit, Dimal Basha, ka përsëritur qëndrimin se Kuvendi është konstituuar në mënyrë të rregullt, pavarësisht mungesës së votimit për përfaqësuesin serb në Kryesi.
“Mendoj që e keni pa atë shpalljen… është konstituuar Kuvendi”, tha Basha më 16 shtator, pa dhënë më shumë sqarime për veprimet që do të ndërmerren pas 30 shtatorit.
Kritika të ashpra ndaj masës së përkohshme ka shprehur edhe kryeministri në detyrë, Albin Kurti, i cili e ka cilësuar vendimin si një ndërhyrje të panevojshme në punën e Kuvendit dhe si një formë bllokade politike.
“Është një masë e pakuptimtë që ka bllokuar për 25 ditë punën e të gjithë 120 deputetëve. I ka detyruar të vegjetojnë. Kjo është ndërhyrje që i shërben opozitës dhe jo drejtësisë”, ka deklaruar Kurti.
Ai madje e ka krahasuar vendimin me një “absurd mjekësor”, duke ironizuar se “sikur të jepej për gjyqtarët, do t’i fuste në pushim shëndetësor kolektiv”.
Edhe pse masa përfundon më 30 shtator, vendimi përfundimtar i Gjykatës Kushtetuese mbi kushtetutshmërinë e konstituimit të Kuvendit ende nuk është bërë publik. Nëse gjykata konstaton se procesi ishte në kundërshtim me Kushtetutën, atëherë mund të kërkohen hapa të rinj proceduralë, që do të vononin edhe më tej formimin e qeverisë së re.
Për momentin, pritet që Presidenca të nisë konsultimet me partinë fituese, në përputhje me afatet kushtetuese, duke i hapur rrugë një dinamike të re politike në vend – gjithmonë në pritje të sqarimeve përfundimtare nga Kushtetuesja.
