Komuna e Mitrovicës Veriore nuk e ka pranuar iniciativën e një grupi të qytetarëve serb për të filluar një peticion për shkarkimin e kryetarit të kësaj komune nga funksioni, Erden Atiq, raporton Anadolu, transmeton KosovaPost.
Kryetari i Kuvendit Komunal të Mitrovicës së Veriut, Nexhat Ugljanin, ka thënë për Anadolu se nuk e ka pranuar kërkesën e tyre për shkak se procedura e paraparë me Udhëzimin Administrativ të Ministrisë së Administrimit të Pushtetit Lokal (MAPL) për shkarkimin e kryetarit të komunës me peticion, nuk është zbatuar.
“Bëra sqarim brenda afatit ligjor se kërkesa nuk është në përputhje me Udhëzimin Administrativ, sepse kërkesa duhet të përmbajë njoftim për formimin e një grupi të qytetarëve që do të regjistrohen në Komisionin Qendror të Zgjedhjeve (KQZ), ata këtë nuk e kanë bërë, ata vetëm e kanë dorëzuar kërkesën”, theksoi Ugljanin.
Ministria Administrimit të Pushtetit Lokal në shtator të këtij viti, ka publikuar udhëzimin administrativ që u mundëson qytetarëve që nëpërmjet një peticioni t’i largojnë kryetarët e komunave veriore, udhëzim i cili u hartua nga Qeveria e Kosovës në kuadër të hapave për shtensionimin e plotë të situatës në veri.
Zgjedhjet e jashtëzakonshme të 23 prillit nga të cilat u emëruan katër kryetarë shqiptarë të komunave me shumicë serbe ishin bojkotuar nga popullata serbe.
Institucionet e Kosovës janë deklaruar kundër kërkesave për dorëheqje të kryetarëve në katër komunat në veri të Kosovës dhe kanë thënë se zgjedhjet në këto komuna do të mund të mbahen vetëm pas organizmit të një peticioni me të cilin kryetarët do të mund të largoheshin nga detyra.
Ministri i Pushtetit Lokal, Elbert Krasniqi muaj më parë ka thënë se çfarëdo kërkese tjetër për largimin e kryetarëve në veri, përveç me peticion, është kërkesë e Serbisë dhe si e tillë nuk do adresohet.
Ligji për Vetëqeverisje Lokale në Kosovë specifikon se në zgjedhje të parakohshme për kryetar të komunës mund të shkohet në rast se kryetari aktual jep dorëheqje; në rast se qytetarët kërkojnë shkarkimin e kryetarit të komunës përmes një peticioni të nënshkruar nga 20 për qind e votuesve të komunës përkatëse; apo në rast se kryetari i komunës nuk paraqitet në vendin e punës më shumë se një muaj, pa arsye.
