Ministri i Bujqësisë, Faton Peci vizitoi hapësirat e objektit të Ministrisë së Bujqësisë e ku janë të vendosura edhe zyret e AAK-së në Ulpianë, ndërsa njofton se ka rikthyer mbi 600 metra katrorë në shërbim të instutucionit të Ministrisë së Bujqësisë, përcjell Kosova Post.
Pasi foli për rikthimin në pronësi të ministrisë, Peci shprehet optimist se instancat e sistemit të drejtësisë do të marrin një vendim meritor që objekti i Ministrisë dhe hapësirat për rreth saj të jenë në shfrytëzim dhe shërbim për titullarin.
Postimi iplotë i Pecit në Facebook:
I rikthyem mbi 600 metra katrorë në shërbim të titullarit; Ministrisë së Bujqësisë!
Sot vizitova hapësirat e objektit të Ministrisë së Bujqësisë në Lagjen Ulpiana në Prishtinë, ku kemi rikthyer mbi 600 metra katror në shërbim të institucionit. Së shpejti do të fillojmë me procesin e renovimit.
Mbetem optimist se instancat e sistemit të drejtësisë do të marrin një vendim meritor që objekti i Ministrisë dhe hapësirat për rreth saj të jenë në shfrytëzim dhe shërbim për titullarin dhe njëherit të mundësohet zbatimi i vendimit tim si Ministër i marrë me datë 22.08.2023.
