“Modeli i sulmeve tregon se forcat mbrojtëse izraelite kanë shkelur në mënyrë sistematike parimet themelore të ligjit ndërkombëtar humanitar, të dallimit, proporcionalitetit dhe kujdesit në sulme,” deklaroi Ilze Brands Kehris.
Kombet e Bashkuara (OKB) të martën shprehën shqetësim të thellë lidhur me taktikat ushtarake të Izraelit në Gaza, duke paralajmëruar se sulmet izraelite mund të përbëjnë “shkelje sistematike” të ligjit ndërkombëtar humanitar.
“Modeli i sulmeve tregon se forcat mbrojtëse izraelite kanë shkelur në mënyrë sistematike parimet themelore të ligjit ndërkombëtar humanitar, të dallimit, proporcionalitetit dhe kujdesit në sulme,” deklaroi Ilze Brands Kehris, ndihmëssekretare e përgjithshme për të drejtat e njeriut në një seancë të Këshillit të Sigurimit të OKB-së mbi Palestinën.
Ajo theksoi se në sulmet izraelite është shkatërruar infrastruktura civile e Gazës, përfshirë vende që kanë status të mbrojtur sipas ligjit ndërkombëtar, si spitalet, shkollat dhe shërbime të tjera kyç, përfshirë energjinë elektrike, ujin dhe kanalizimin.
Ajo shtoi se shkatërrimi i këtyre objekteve kontribuon drejtpërdrejt në rrezikun në rritje të urisë në Gaza.
Kehris theksoi përgjegjësinë e Izraelit si fuqi okupuese sipas ligjit ndërkombëtar, duke thënë se është e nevojshme “të mbrohen civilët palestinezë dhe t’u sigurohen atyre nevojat jetike.”
Izraeli ka vazhduar ofensivën shkatërruese në Rripin e Gazës që nga sulmi i Hamasit në tetor të vitit të kaluar, pavarësisht një rezolute të Këshillit të Sigurimit të Kombeve të Bashkuara që kërkon ndërprerje të menjëhershme të zjarrit.
Që atëherë, janë vrarë më shumë se 43.600 njerëz, kryesisht gra dhe fëmijë, dhe rreth 103.000 të tjerë janë plagosur, sipas autoriteteve lokale shëndetësore, shkruan trtbalkan.Izraeli është akuzuar për gjenocid në Gjykatën Ndërkombëtare të Drejtësisë për veprimet e tij në Rripin e Gazës.
