Presidentja e Republikës së Kosovës, Vjosa Osmani, para hyrjes në Samitin e Liderëve të Komunitetit Politik Evropian (EPC) në Kopenhagë, ka deklaruar se Serbia e drejtuar nga Aleksandar Vuçiq po ndjek modelin e Kremlinit në raport me fqinjët.
“Vuçiq është përpjekur ta kopjojë Putinin duke përdorur taktika agresioni dhe destabilizimi kundër fqinjëve. Dhe për këtë arsye është shumë, shumë e rëndësishme që shtetet anëtare të BE-së të kuptojnë se shpërblimi i Serbisë për qëndrimin me Rusinë nuk është rruga përpara. Vendet që janë në një përputhje 100% me BE-në duhet të shpërblehen, jo ata që kanë zgjedhur Moskën si rrugën e tyre përpara”, theksoi Osmani.
Ajo e bëri të qartë se kërcënimet ndaj paqes dhe sigurisë në Evropë nuk burojnë vetëm nga Rusia, por edhe nga Serbia si “zgjatimi i Rusisë në Ballkanin Perëndimor”.
“Aktualisht ekzistojnë dy kërcënime kryesore të sigurisë që vijnë kundër vendeve brenda kontinentit tonë: Njëri vjen nga Rusia, natyrisht, si dhe tjetri, veçanërisht në rajonin tonë, vjen nga përfaqësuesi i Rusisë, zgjatimi i Rusisë në rajonin tonë, e kjo është Serbia. Sigurisht, ekziston një qëndrueshmëri e nevojshme nga Bashkimi Evropian në trajtimin e të dy këtyre agresorëve, sepse nuk mund ta trajtosh njërin si agresor dhe si diktator dhe tjetrin si partner”, tha Osmani.
Tutje nënvizoi se Serbia ka ndjekur historikisht të njëjtën logjikë si Rusia, duke mos i pranuar shtetet fqinje si të pavarura dhe duke vepruar me agresion kundër tyre.
“Serbia i ka trajtuar shtetet fqinje si shtete joekzistente, si shtete të përkohshme, si shtete kundër të cilave vepron me agresion. Sigurisht, është një kopjim nga manuali i Rusisë. Fatkeqësisht, Rusia gjithashtu e mbështet Serbinë në këtë përpjekje. Pra, tradicionalisht dhe për shekuj me radhë, ata kanë përdorur të njëjtin lloj koncepti. Rusia flet për Rusinë e madhe dhe botën ruse. Serbia flet për Serbinë e madhe dhe botën serbe. Dhe ata përdorin të njëjtat metoda. Pra, për ne, të dyja janë një kërcënim”, theksoi Osmani.
Sa i përket samitit të Liderëve të Komunitetit Politik Evropian në Kopenhagë, Osmani theksoi se gjithmonë ndihet e lumtur të jetë pjesë e tij në emër të popullit të Republikës së Kosovës dhe të përfaqësoj vendin në këtë iniciativë të rëndësishme.
“Dua të përgëzoj Danimarkën për organizimin e një samiti kaq të rëndësishëm pavarësisht kërcënimeve të vazhdueshme të sigurisë që po vijnë kundër të gjithë Evropës nga Rusia. Padyshim, kjo do të jetë një tjetër mundësi e shkëlqyer për ne për të diskutuar se si t’i përballojmë kërcënimet e tilla me unitet midis të gjithë anëtarëve, jo vetëm brenda Bashkimit Evropian, por edhe atyre prej nesh që janë jashtë Bashkimit Evropian, por që aspirojnë të bashkohen dhe të kontribuojnë në sigurinë, stabilitetin dhe prosperitetin e përgjithshëm të Evropës. Megjithatë, duhet të shtoj se vetëm uniteti nuk është i mjaftueshëm. Ekziston një domosdoshmëri e vazhdueshme edhe për qëndrueshmëri në përballjen me agresorët dhe diktatorët”, tha Osmani.
Presidentja pati edhe një porosi për Bashkimin Evropian. “BE-së do të doja t’i thosha se historia tregon se qetësimi i diktatorëve, qetësimi i autokratëve nuk çon kurrë në paqe afatgjatë. Fatkeqësisht, qetësimi i diktatorëve gjithmonë ka çuar historikisht në inkurajimin e tyre për të përdorur më shumë dhunë. Pra, sigurisht, thirrja jonë është të sigurohemi që ata të jenë shumë të kujdesshëm me mënyrën se si trajtohet përfaqësuesi i Rusisë në rajonin tonë dhe të mos i qetësojmë ata deri në atë masë sa të vazhdojnë të përdorin dhunë. Ne sapo përkujtuam dyvjetorin e aktit të agresionit të Serbisë kundër vendit tim, në veri të vendit tim. Bashkimi Evropian ka bërë vazhdimisht thirrje për llogaridhënie. Nuk ka pasur asnjë llogaridhënie. Është koha që ata të flasin hapur”, tha Osmani.
Në pyetjen shtesë të gazetarëve nëse zyrtarët e BE-së po tregohen hipokritë në këtë drejtim, ajo theksoi: “Jo, nuk po them se janë hipokritë. Mendoj se kanë qëllimet më të mira. Sidoqoftë, është e rëndësishme që të gjithë të mësojnë nga historia. Dhe siç thashë, historia, veçanërisht mënyra se si u trajtua Putini, na tregon se qetësimi i njerëzve si Putini nuk çon kurrë në paqe afatgjatë”.
Ajo tha se nëse në rajonin tonë nuk ka ndikim pozitiv perëndimor, fuqitë keqdashëse, siç i quajti “trekëndëshi i së keqes”, Rusia, Kina dhe Irani, vijnë gjithmonë atje. “Jo për bamirësi, por sepse kanë interesa strategjike keqdashëse. Pra, është shumë e rëndësishme që zgjerimi të shtyhet përpara në Ballkanin Perëndimor. Ato vende në Ballkanin Perëndimor që plotësojnë kriteret dhe që gjithashtu punojnë drejt vlerave që BE-ja përfaqëson duhet të merren parasysh për të ecur përpara”, tha Osmani.
Osmani kujtoi se 97% e qytetarëve të Kosovës janë pro anëtarësimit në BE dhe NATO, duke theksuar se Kosova tashmë ka përmbushur detyrimet që varen nga vetë shteti. “BE është e vetmja rrugë për ne, për popullin e Kosovës, 97% e të cilëve janë në favor të anëtarësimit në BE dhe NATO. Fatkeqësisht, për shkak të konsideratave të brendshme politike të disa shteteve anëtare, aplikimi ynë nuk është trajtuar ende. Por durimi ynë nuk do të shteret. Ne do të vazhdojmë të ecim në atë rrugë sepse nuk flirtojmë kurrë me fuqi të tjera, me fuqi dashakeqe. Do të punojmë shumë derisa të bindim çdo shtet anëtar se Kosova nuk është një barrë. Kosova është kontribuese, është një vend që, sipas një raporti të Gallup International vetëm pak ditë më parë, është numri një në Evropë për sa i përket sigurisë, mbrojtjes dhe sundimit të ligjit, dhe numri tre në botë. Jemi shumë krenarë që jemi një vend që po përputhet me BE-në në politikën e jashtme dhe të sigurisë dhe një vend që po kontribuon në atë që janë vlerat e BE-së”, nënvizoi Osmani.
Duke folur për agresionin rus ndaj Ukrainës ajo dha një mesazh për popullin ukrainas, duke thënë se “nuk ka asgjë që mund të qëndrojë para në rrugën e një populli që dëshiron të jetë i lirë dhe lufton për lirinë e tij. Ata do ta fitojnë këtë luftë”, tha ajo.
E pyetur nga gazetarët danezë për marrëveshjen rreth strehimit të burgosurve nga Danimarka, Osmani konfirmoi se ajo tashmë është ratifikuar nga Kuvendi i Kosovës.
“Nuk ka të bëjë me strehimin e kriminelëve. Ka të bëjë me mbështetjen reciproke midis vendeve që ndajnë të njëjtat vlera dhe me ruajtjen e standardeve më të larta ndërkombëtare të të drejtave të njeriut. Danimarka ishte pranë nesh kur përjetonim gjenocid, tani është radha jonë të jemi pranë saj”, tha presidentja.
