Ministrja e Mjedisit dhe Planifikimit Hapësinor, Fitore Pacolli, ka thënë se Kosova ka nevojë për një vizion të qartë dhe afatgjatë për zhvillimin e territorit, duke theksuar se planifikimi hapësinor duhet të jetë në qendër të zhvillimit të qëndrueshëm.
Në një simpozium kushtuar planifikimit hapësinor, Pacolli tha se për herë të parë po organizohet një ngjarje e këtij niveli, ku janë bërë bashkë profesionistë vendorë e ndërkombëtarë, përfaqësues të institucioneve, akademisë dhe partnerë ndërkombëtarë.
Ajo theksoi se idetë dhe propozimet që do të dalin nga simpoziumi do të shërbejnë si udhërrëfyes për politikat ministrore dhe vendimet strategjike.
Pacolli bëri me dije se ministria është duke rishikuar në mënyrë të gjithanshme kornizën ligjore për planifikimin hapësinor, ndërtimin dhe banimin, duke përfshirë edhe normat teknike dhe politikat për banimin e përballueshëm e social.
Sipas saj, qëllimi është që të krijohen rregulla që mundësojnë qytete funksionale, hapësira të gjelbra dhe komunitete të qëndrueshme, duke garantuar mbrojtjen e mjedisit dhe cilësinë e jetës së qytetarëve.
Ministrja kritikoi mënyrën e zhvillimit të qyteteve pas luftës, duke thënë se ato janë zgjeruar pa kontroll, hapësirat e gjelbra janë zvogëluar, tokat bujqësore janë zënë nga ndërtimet, ndërsa lumenjtë shpesh janë trajtuar si hapësira për ndërtim.
Ajo vlerësoi se këto zhvillime nuk janë vetëm çështje të arkitekturës dhe planifikimit urban, por lidhen drejtpërdrejt me shëndetin, sigurinë, mjedisin dhe mirëqenien e qytetarëve.
Pacolli përmendi edhe ndryshimet demografike dhe migrimin nga zonat rurale drejt qyteteve, duke theksuar nevojën për rishikimin e mënyrës së planifikimit të territorit, banimit, transportit, shërbimeve publike dhe investimeve.
Në këtë kontekst, ajo e cilësoi Vizionin Hapësinor të Kosovës 2050 si një platformë për përcaktimin e prioriteteve afatgjata të zhvillimit të vendit, duke harmonizuar zhvillimin ekonomik me mbrojtjen e natyrës dhe investimet infrastrukturore me përmirësimin e cilësisë së jetës.
Pacolli tha se ministria po punon për avancimin e kornizës ligjore dhe planit hapësinor të Kosovës, si dhe për projekte konkrete për rehabilitimin e liqeneve, lumenjve, ligatinave dhe parqeve.
Ajo theksoi se miratimi i vendimit për hartimin e planit të ri hapësinor është një hap i rëndësishëm, por suksesi do të varet nga zbatimi i tij në terren dhe orientimi i investimeve në funksion të interesit publik.
Në fund, ministrja nënvizoi rëndësinë e bashkëpunimit ndërmjet institucioneve qendrore dhe lokale, akademisë, profesionistëve dhe partnerëve ndërkombëtarë, duke theksuar se qytetarët duhet të përfshihen drejtpërdrejt në proceset e planifikimit të hapësirave ku jetojnë.
