Ministrja Fitore Pacolli ka reaguar lidhur me zhvillimet politike dhe çështjen e Ligjit për Dhomat e Specializuara, duke thënë se, sipas saj, kundërshtarët politikë nuk e kanë shqetësim kryesor këtë ligj apo ish-pjesëtarët e UÇK-së që ndodhen në Hagë, përcjell KosovaPost.
Pacolli ka deklaruar se qëllimi, sipas saj, është marrja e pushtetit përmes mënyrave të tjera, pasi kjo nuk po arrihet përmes votës së qytetarëve.
“Nuk e kanë hallin te Ligji për Dhomat e Specializuara. As te çlirimtarët që janë në Hagë. Hallin e kanë te pushteti që nuk po arrijnë ta marrin me votë”, ka shkruar Pacolli.
Ajo ka thënë se, kur vullneti i qytetarëve nuk mund të ndryshohet përmes zgjedhjeve, po tentohet të ndryshohet përmes “bllokadave, imponimeve dhe presionit”.
Sipas Pacollit, zgjidhja për situatën aktuale është në Kuvend.
“Zgjidhja është në Kuvend. Kandidatët për President janë aty. Ejani votojeni projektligjin në lexim të dytë për Dhomat e Specializuara dhe më pas zgjedhni mes Glauk Konjufcës dhe Feride Rushitit për President/e të Republikës”, ka shkruar ajo në facebook.
