Bota është zgjuar me një president të ri të Shteteve të Bashkuara, republikanin Donald Trump, që mundi rivalen demokrate Kamala Harris në zgjedhjet e 5 nëntorit. Por, ndërsa do të duhen më shumë se dy muaj para se republikani të marrë zyrtarisht detyrën, ekipi i tij po bëhet gati për transferimin e pushtetit, kalimin në Shtëpinë e Bardhë dhe shpërndarjen e programit.
Siç u bë e ditur, 78-vjeçari mund të njoftojë disa prej zgjedhjeve kyçe të kabinetit të tij gjatë ditëve në vazhdim. Në një deklaratë, ekipi që po udhëheq transferimin, tha se do t’i paraqesin së shpejti shefit të tyre një listë emrash me ekspertë, prej të cilëve mund të zgjedhë skuadrën e tij. Siç u tha, Trump do të zgjedhë personel që do të vërë në zbatim politikat për ta bërë jetesën e amerikanëve sërish të përballueshme e të sigurt.
Sfiduesja demokrate, Kamala Harris, e pranoi humbjen në një fjalim pasditen e së mërkurës, ku u zotua për transferim paqësor të pushtetit. “Rezultati i këtyre zgjedhjeve nuk është ai që kemi dashur, nuk është ai për të cilin kemi luftuar, nuk është ai për të cilin kemi votuar. Por më dëgjoni kur them, se drita e premtimit të Amerikës do të digjet gjithmonë për sa kohë që ne nuk dorëzohemi kurrë dhe për sa kohë që ne vazhdojmë të luftojmë.”
Po ashtu, presidenti Joe Biden telefonoi të mërkurën presidentin e zgjedhur Trump për t’i uruar fitoren dhe e ftoi për një takim në Shtëpinë e Bardhë. Përmes një deklarate, Shtëpia e Bardhë bëri të ditur se Biden është i angazhuar “për të siguruar një tranzicion të qetë dhe ka theksuar rëndësinë për të bashkuar vendin”. 81-vjeçari pritet t’i drejtohet vendit me një fjalim më vonë gjatë së enjtes, shkraunA2CNN.Por, ndërsa fitorja e Donald Trump-it është konfirmuar, pavarësisht se rezultatet zyrtare nuk kanë dalë ende, një tjetër garë e rëndësishme është ende në lojë – ajo për Dhomën e Përfaqësuesve. Pas humbjes së Senatit, demokratët i kanë varur të gjitha shpresat atje, por kampi i kuq vijon të ketë përparësinë edhe aty. Megjithatë, për rezultatin do duhet pritur edhe pak, deri sa të përcaktohen të gjitha vendet e dhomës prej 435 anëtarësh.
