Ka përfunduar takimi i ushtrueses së detyrës së Presidentes, Albulena Haxhiu, me përfaqësuesit e partive politike, ku është diskutuar caktimi i datës për zgjedhjet e reja parlamentare.
Pas konsultimeve, 7 qershori është përmendur si data më e përshtatshme për mbajtjen e zgjedhjeve, duke marrë mbështetje nga shumica e partive.
Kryetari i PDK-së, Bedri Hamza, konfirmoi se subjekti që ai drejton do të garojë me listë të vetme, por me përfshirje të figurave të reja.
“PDK do të shkon në zgjedhje, Lista e partisë së PDK-së, brenda listës do të ketë edhe risi edhe emra e figura tjera”, tha ai para gazetarëve.
Nga LDK-ja, Jehona Lushaku-Sadriu theksoi se partia e saj e mbështet datën 7 qershor, duke u bazuar edhe në kërkesat e Komisionit Qendror të Zgjedhjeve për më shumë kohë për organizim.
“Si LDK dhamë opininmion që brenda kornizave të shpallet data 7 qershori si data e zgjedhjeve, me që ishte një arsyetim që KQZ ka kërkuar me që i nevojitet më shumë mobilizim për organizimin e zdhjeve. Jemi dakord me datën 7 qershor”, tha Lushaku-Sadriu.
Edhe nga Aleanca për Ardhmërinë e Kosovës u tha se ekziston pajtueshmëri për këtë datë, ndonëse nuk kishte preferencë fillestare.
“Prej asaj që pamë në takim me Haxhiun, ka një dakordancë që data e zgjedhjeve të jetë 7 qershori, edhe ne jemi pajtu edhe pse skemi pasur preferencë. Zgjedhjet janë shansë për vendin… Populli i Kosovës duhet me shfrytëzu këtë shans të zgjedhjeve të datës 7 qershor”, tha Ardian Gjini.
Ky takim vjen pasi Presidenca ka konfirmuar koordinimin me kryesuesin e KQZ-së, Kreshnik Radoniqi, lidhur me përgatitjet për procesin zgjedhor.
Kosova pritet të shkojë në zgjedhje të reja parlamentare pasi Kuvendi nuk arriti ta zgjedhë presidentin brenda afatit kushtetues prej 34 ditësh. Sipas vendimit të Gjykatës Kushtetuese, në raste të tilla Kuvendi shpërndahet automatikisht.
Zgjedhjet duhet të mbahen brenda 45 ditësh, ndërsa 7 qershori konsiderohet si afati i fundit ligjor për organizimin e tyre.
