Tensionet gjatë protestës studentore në Tiranë marrin një tjetër kthesë. Flakët kanë përfshirë katin e parë të Ministrisë së Financave, ndërsa tymi del nga godina. Incidenti vjen pas sulmeve me gurë ndaj institucioneve dhe hyrjes me forcë të protestuesve në Ministrinë e Ekonomisë dhe Inovacionit.
Situata është përshkallëzuar më tej gjatë protestës studentore në Tiranë, ku një zjarr ka përfshirë katin e parë të godinës së Ministrisë së Financave.
Flakët dhe tymi janë të dukshëm në këtë pjesë të ndërtesës, duke shënuar një tjetër incident të rëndë gjatë protestës së kësaj të mërkure.
Zjarri në Ministrinë e Financave vjen pas një serie sulmesh ndaj institucioneve shtetërore. Më herët, një grup protestuesish theu derën hyrëse të Ministrisë së Ekonomisë dhe Inovacionit, duke arritur të futej në ambientet e brendshme.
Nga godina u nxorën objekte të ndryshme, të cilave më pas iu vu flaka. Gjithashtu, disa ministri u goditën me gurë dhe sende të forta, duke shkaktuar thyerje xhamash dhe dëmtime materiale.
Gjatë këtyre incidenteve nuk është raportuar për ndërhyrje të policisë pranë godinave të sulmuara, ndërsa më herët forcat e rendit kishin përdorur gaz lotsjellës dhe ujë me presion për të shpërndarë protestuesit.
Përshkallëzimi i fundit vjen pas disa orësh tensionesh, gjatë të cilave janë regjistruar edhe zjarre në rrugë dhe dëmtime të pronës publike e private.
Ende nuk ka të dhëna të konfirmuara për përmasat e dëmeve në katin e parë të Ministrisë së Financave apo nëse ka persona të lënduar nga zjarri.
Ndërkohë, mbetet e paqartë nëse flakët janë përhapur në pjesë të tjera të godinës.
