Persona të famshëm në Festivalin e 77-të të Filmit në Kanë në Francë shprehën solidaritet me Palestinën të shtunën me përdorimin e flamurit palestinez dhe motiveve në veshjet e tyre, raporton Anadolu.
Personalitete me famë botërore që morën pjesë në festivalin e filmit nga 14 deri më 25 maj, në heshtje përcollën mbështetjen për Palestinën nëpërmjet veshjeve dhe aksesorëve teksa ecnin në tapetin e kuq.
Modelja e njohur amerikane me origjinë palestineze, Bella Hadid, tërhoqi vëmendjen me fustanin e saj të kuq të dizajnuar duke përdorur “kefijen”.
Hadid, e cila ka shprehur mbështetje për Palestinën në shumë raste, mori lavdërime në mediat sociale për shfaqjen e solidaritetit të saj me Palestinën me veshjen e saj të frymëzuar nga kefije, shalli i famshëm që është bërë simbol i rezistencës palestineze.
– Veshja e Blanchett pasqyron flamurin palestinez
Aktorja fituese e Oskarit, Cate Blanchett, e cila mori pjesë në festival, u bë temë në rrjetet sociale me veshjen e saj që pasqyron flamurin palestinez.
Blanchett, e cila kishte kërkuar më parë armëpushim në Rripin e Gazës, tërhoqi vëmendjen teksa kombinimi i pjesës së përparme të zezë dhe pjesës së pasme të hapur rozë dhe jeshile të fustanit të saj, u bashkua me tapetin e kuq, duke ngjallur mendime për flamurin palestinez.
Përdoruesit e mediave sociale lavdëruan Blanchettin si “të zgjuar” për solidaritetin e veçantë me veshjen e saj.
Aktorja britanike Pascale Kann kishte veshur një veshje me shkrim arab që shkruante “Palestine”.
– Tërhoqën vëmendjen motivet e shalqirit në tapetin e kuq
Aktorja indiane Kani Kusruti mori pjesë në premierën e filmit të saj në festival me një çantë në formën e një fete shalqiri.
Aktorja franceze me origjinë algjeriane, Leila Bekhti, mbante një karficë me motive shalqiri, simbol i solidaritetit me Palestinën.
Karfica në jakën e fustanit të saj të zi teksa ecte në tapetin e kuq 60 metra përpara shfaqjes së filmit të saj u admirua në mediat sociale.
Aktorja italiane Jasmine Trinca ka treguar mbështetjen e saj duke mbajtur një karficë me modelin e flamurit palestinez.
Aktori australian Guy Pearce mbante një byzylyk të përbërë nga ngjyrat e flamurit palestinez.
Regjisorja marokene Asmae El Moudir pozoi për gazetarët, duke treguar flamurin palestinez të qepur në dorezën e saj.
