Policia britanike ka arrestuar pesë persona pranë një baze ajrore në Angli, nën dyshimin për terrorizëm dhe vepra penale të lidhura me eksplozivë.
Arrestimet u kryen një ditë më parë, pas informacioneve të marra nga banorët e zonës pak pas mesnatës. Njësitë e ushtrisë për çaktivizimi e bombave mbërritën në vendngjarje, ndërsa dhjetëra banesa pranë zonës u evakuuan si masë paraprake.
Sipas policisë kundër terrorizmit, pesë të dyshuarit janë arrestuar edhe me dyshimin se po përgatitnin një akt terrorist. Identitetet e tyre nuk janë bërë publike dhe autoritetet nuk kanë dhënë detaje mbi një motiv të mundshëm.
“Jemi në fazat e hershme të një hetimi dhe pesë burra mbeten në paraburgim”, deklaroi Vicki Evans, oficere e lartë e Policimit Kundër Terrorizmit.
Baza ajrore përdoret nga forcat amerikane dhe është e lidhur me operacionet e bombarduesve me rreze të gjatë veprimi. Presidenti amerikan Donald Trump i përshkroi arrestimet si “fantastike” dhe tha se autoritetet amerikane dhe britanike i kishin të dyshuarit nën vëzhgim prej një kohe të gjatë.
Megjithatë, media britanike, përfshirë BBC, The Guardian dhe The Telegraph, raportuan duke cituar burime se operacioni nuk ishte rezultat i një informacioni të inteligjencës. Sipas këtyre raportimeve, sinjalizimet nga banorët vendas mund të kenë ndihmuar në njoftimin e autoriteteve.
Ambasada amerikane në Londër u bëri thirrje qytetarëve amerikanë në Mbretërinë e Bashkuar të tregojnë kujdes dhe të jenë të vëmendshëm ndaj sigurisë personale.
